Нам улууһун иистэнньэҥнэрэ байыаннай таҥаһы тигии “Үлэ-иис күрэҕэ” өрөспүүбүлүкэтээҕи куонкуруска кытталлар. Кинилэр: Екатерина Суздалова, Анна Ядрихинская, Татьяна Новгородова, Татьяна Омина, Мария Чепалова, Прасковья Протопопова, Розалия Местникова, Людмила Сивцева, Мария Потапова. Салайааччы – Татьяна Омина.
“Илии сылааһа” өрөспүүбүлүкэтээҕи иис сыаҕын тэрйиитинэн, бүгүн Дьокуускайга “Үлэ-иис күрэҕэ” байыаннай таҥаһы тигии куонкуруһа саҕаланна. Алта улуустан уонна Дьокуускайтан 7 хамаанда от ыйын 8-11 күннэригэр байыаннай таҥас тигиэхтэрэ.
Бу күннэр усталарыгар “Кыайыы 50 сыла” спорт дыбарыаһыгар иистэнньэҥ дьахталлар “Эр хоһуун” диэн 12 таҥастан турар кэмпилиэк тигиэхтэрэ. Куонкурус түмүгүнэн бастыҥ 6 хамаанда талыллан үс бастыҥ миэстэни ылыахтара. Маны тэҥэ саамай сатабыллаах кырыйыы маастарын (закройщица) быһаарыахтара.
Бэлиэтээн эттэххэ, Кыһыл Дэриэбинэ «Сайдыы» сынньалаҥ киинигэр Хатыҥ Арыы нэһилиэгин истиҥ ийэлэрэ, эбэлэрэ бэйэлэрэ кыра сыах арыйан күн бүгүҥҥэ диэри иистэнэ олороллор. Былырыын кинилэр балаҕан ыйын 15-18 кк. ыытыллыбыт «Илии сылааһа-2023» диэн байыаннай таҥаһы тигиигэ кэтэхтэн өрөспүүбүлүкэтээҕи көрүү-күрэхтэһиигэ алта киһилээх, Дария Мальцева салайааччылаах «Сыдьаайа» хамаандата кыттан, иккис бириистээх миэстэни ылбыта уонна иистэнэр массыынанан, өтүүгүнэн наҕараадаламмыта.
“Эҥсиэли” хаһыат