Бүгүн Нам улууһун Нам сэлиэнньэтигэр, РФ президенэ Владимир Путин көҕүлүүр «Жилье и городская среда» национальнай бырайыак чэрчитинэн, «Хаарбах уонна саахалланар туруктаах дьиэлэртэн дьону көһөрүү» республикатааҕы аадырыстаммыт программанан 4 этээстээх, 23 квартиралаах, толору хааччыллыылаах таас дьиэ үөрүүлээх аһыллыыта буолла.
Ленина аат. уулусса 29 №-гэр турар саҥа дьиэни “Перспектива” ХЭТ, салайааччы Вадим Анисимов, экспертизатын ыытан, бырайыагын оҥорон, 2023 сыл муус устартан тутан саҕалаабыта уонна 9 ый иһинэн үлэҕэ киллэрдэ.
Сырдык, сылаас саҥа дьиэҕэ 22 ыал “Хаарбах туруктаах дьиэттэн дьону көһөрүү” программанан квартиралар күлүүстэрин туттулар. Итиэннэ биир квартира хаһаайыныгар “Тулаайах оҕолору дьиэнэн хааччыйыы” программананан күлүүһү туттардылар.
Майя Федорова