Нам улууһугар муустан иһит оҥоруутугар көрүү-куонкурус Ленскэй нэһилиэктэн саҕаланна. Бүгүн Нам сэлиэнньэтин П.П. Ядрихинскай-Бэдьээлэ аатынан Намнааҕы Олоҥхо дьиэтигэр остуолга ууруллар муустан 11 бастыҥ иһит турда.
Ону тэҥэ, “Мороз и блеск” диэн остуолга ууруллар муус фигура куонкуруска ыаллыы сытар Горнай улууһуттан Семен уонна Софрон Даниловтар ааттарынан духуобунас киин үлэһиттэрэ кыттыыны ыллылар.
50 үөһээ саастаахтарга Александр Шадрин, 30 диэри саастаахтарга Семен Старостин кыайыылаахтарынан ааттаннылар. 50 диэри саастаахтарга Степан Бястинов үлэтэ — бастакы миэстэ. Вера Тимофеева уонна Сандр Находкин үлэлэрэ иккис буоллулар. Үһүс миэстэни Павел Обутов уонна Горнайтан ыалдьыттар үллэһиннилэр. Вера Тимофеева мууһунан иһит оҥоруутугар аан маҥнайгытын холоммут. Оттон Сандр Находкин иһитин халыыбын таһаарарыгар мууһун хаста да алдьаппыт.
Ленскэй нэһилиэк олохтоох дьаһалтата уонна Олоҥхо дьиэтэ биир сүбэнэн үэлииллэрин горнайдар бэлиэтээтилэр:
— Бас-көс дьоммут тэрээһин саҕаланыаҕыттан бүтүөр диэри суолта ууран сылдьалларын убаастыы көрдүбүт. Нам улууһугар бүгүн төрдүө буолан кэллибит. Быйыл СӨ Ил Дархана Айсен Николаев уурааҕынан, биһиги кииммит Олоҥхо дьиэлэрин ситимнэригэр киирбитинэн, төрүт култуураҕа хайысхалаах үлэбитин саҕалаатыбыт. Кэллиэгэлэрбит Олоҥхону үйэтитиинэн, Олоҥхону ыһыктыбакка утумнаахтык үлэлииллэриттэн холобур ылабыт. Бүгүҥҥү күҥҥэ Эҥсиэли хочотугар улахан махталбытын тиэрдэбит, — диэн Семен уонна Софрон Даниловтар ааттарынан духуобунас киин дириэктэрэ Александра Алексеева эттэ.
Алексей Федосеев, маастар:
— Мууһунан дьарыктанааччы маастардар остуолу киэргэтэргэ, бырааһынньыктарга аналлаах муустан иһиттэри эрдэттэн оҥорор этибит. Холобура, бэлиэ күннэргэ, сыбаайбаҕа, Олоҥхо дьиэтэ сакаастыыр буолара.
Киэҥ эйгэҕэ, нэһилиэнньэҕэ оҥорон көрдөрөр сыаллаах бу аан маҥнайгы тэрээһин буолар. Бастакы куонкурус көрүүтүнэн, дьон сатабыла көһүннэ. Тус бэйэм элбэх анал инструменнарынан чочуйан таһаарар эбит буоллахпына, кинилэр туттубут тэриллэрэ бука сүгэ уонна быһах буолар. Дьэ, бу туттар тэриллэринэн үчүгэй көстүүлээх иһиттэри оҥорон таһаарбыттар.
Маннык ыытыллар куонкурустарга төһөнөн элбэх киһи кыттыыны ылар да, соччонон араас элбэх сонун өй-санаа киирэр. Холобура, биһиги урут муустан кытыйа, балык эрэ оҥорор эбит буоллахпытына, бүгүҥҥү күҥҥэ үгүс киһи муустан араас оҥоһуктары оҥорон толкуй биэрэр. Куонкурус сыл аайы ыытылыннаҕына, муустан иһиттэри оҥоруубут өссө тупсуоҕа дии саныыбын.
Харысхан Попов