“Информ УИК” федеральнай бырайыак чэрчитинэн, Нам сэлиэнньэтигэр олунньу 17 күнүттэн кулун тутар 7 күнүгэр диэри УИК чилиэттэрэ сэлиэнньэ быыбардааччыларыгар Россия Президенин быыбарын туһунан иһитиннэрии уонна анкета толотторуутун үлэтэ түмүктэннэ.
Нам сэлиэнньэтигэр 7 УИК баар. Ол курдук, Алена Ноговицына салайааччылаах 352-с нүөмэрдээх УИК чилиэттэрэ Татьяна Исакова, Изабелла Колесова, Марианна Парникова дьиэлэринэн кэрийэннэр быыбардааччыларга быыбар туһунан иһитиннэрии оҥорбуттар.
21 уулуссаны хабар 352-с нүөмэрдээх УИК быыбардааччылара быыбар күннэрин күүтэллэрин быыбардыыр хамыыһыйа председателэ Алена Ноговицына этэр.
“Быыбар-2024” туһунан дьиэлэринэн кэрийэн сиһилии быһааран, чуолкайдаан биэрии үлэбит хайысхатыттан биирдэстэрэ. Нэһилиэнньэ быыбар туһунан интэриэһиргиир ыйытыыларыгар сөптөөх хоруйдары ыллыллар. Дьон быыбардаары кулун тутар 15-17 күннэрин күүтэллэр”, – диир Алена Семеновна.
Ону тэҥэ, МФЦ “Мои документы” кулун тутар 11 күнүгэр 8 чаастан 14:00 чааска диэри; госуслуги; ТИК нөҥүө сайабылыанньа биэрэн, олорор сиргитинэн (фактически) Президент быыбарыгар куоластыахха сөп. Оттон дьиэҕэ ыҥыран куоластааһын сайабылыанньалара кулун тутар 7-17 күннэригэр 14:00 чааска диэри ыытыллар.
Харысхан Попов