Нам сэлиэнньэтин Общественник дьиэтигэр, сэтинньи 20 күнүгэр, куйаар ситиминэн сөбүлээн оонньооччулар «Эҥсиэли games» компьютернай саала аһыллыытыгар маҥнайгы ыалдьыт буолан күрэхтэһиигэ кытыннылар.
«Саала аһыллан үлэлииригэр бары көмөлөспүт дьоммутугар махтанабыт. Оонньооччулар бүгүҥҥү курдук түмсэн иһиэхпит. Бу түмүү бастакы күнэ», — дииллэр сааланы арыйбыт Раиса, Остап Куличкиннар.
Саҥа компьютернай саалаҕа «PS5» приставкаҕа оонньуон баҕалаах элбэх ыччат кэлбит. Улууспутугар приставкаҕа оонньооччулар маннык элбэх буолалларын Нам оонньооччулара соторутааҕыта билбиттэрин бэлиэтииллэр. Эрдэ намнар биирдиилээн оонньооччулара бэйэлэрин икки ардыларыгар дэҥҥэ күрэхтэһии тэрийэллэрэ.
Сурутуу быраабылатынан, 14 киһи күрэхтэспит. Мантан саамай эдэр оонньооччулара Намнааҕы 2-с нүөмэрдээх оскуола 4-с кылааһын үөрэнээччитэ Шамаев Бэргэн буолар. 14 кыттааччыттан хайалара футболу ордук оонньуурун быһаарар күрэхтэһиигэ кыайыылааҕынан Дьокуускайтан кэлбит ыалдьыт, Усуйаана уола Эрхан Иванов тахсан анал харчынан наҕараадаламмыт. Иккис, үһүс миэстэлэри үллэстибит Нам уолаттара Григорий Лукавин 3 чаас босхо оонньуур быраабы, оттон Михаил Слепцов 2 чааһы ылары ситиспиттэр.
«Аан дойдуга куйаар ситимэ муҥутуу сайдыбыт үйэтигэр, эдэр дьон аныгы техниканы сөптөөхтүк туһаналларыгар, аһары барбакка сиэр быһыытынан оонньуулларыгар эрэнэбин. «Эҥсиэли games» компьютернай сааланы Ленскэй нэһилиэк ыччата Куличкина Раиса Семеновна социальнай контракт нөҥүө арыйда. Ону тэҥэ, компьютер оонньуута спорка көрүҥ быһыытынан киирбитэ — киберспорт. Маны этэн туран, эдэрдиин-эмэнниин бары өттүгэр сайда-чэчирии туруоххайыҥ!» — диир баһылык Петр Сокольников.
Бу курдук, туруоруммут сыалгын «сатаныа суоҕа» диэҥҥэ баһыйтарбакка, олоххо киллэриэххэ сөп эбит. Маннык социальнай контрагы туһанар Куличкиннар курдук эдэр ыаллар элбии турдуннар. Баҕа санааны хам баттаамаҥ.
Харысхан Попов