Кыл-сиэл оҥоһуктары оҥоруу ньымалара саха омук өр сылларга илдьэ кэлбит сыаннаһа, культурата буолар. Билиҥҥи сайдыылаах олоххо кыл-сиэл оҥоһук бэйэтин кэрэ көстүүтүн сүтэрэ илик.
П.И. Сивцев аатынан Намнааҕы история уонна этнография түмэлигэр төрүт үгэһи сөргүтээччи, СӨ уус-уран оҥоһукка маастара, уран тарбахтаах уһуйааччы Мария Аманатова үөрэнээччилэрин кытта айар үлэлэрин көрдөрөр «Уруйдан, Дьөһөгөй оҕото!» быыстапка үөрүүлээхтик аһылынна.
Хамаҕатталар мааны кийииттэрэ Мария Николаевна Уус Алдан улууһун Баатаҕай нэһилиэгэр төрөөбүтэ, оҕо сааһа Кэптэни нэһилиэгэр ааспыт. Кини 2006 сылтан кылынан, сиэлинэн дьарыктанар. Уран тарбахтаах маастар үлэлэрэ нэһилиэк, улуус уонна өрөспүүбүлүкэ таһымнаах быыстапкаҕа туран, үгүс дьон биһирэбилин ылар.
Мария Аманатова “Биэһи биирдэ” диэн маастар-кылаастары өрөспүүбүлүкэ таһымыгар, атын улуус ииһинэн үлүһүйээччилэригэр анаан ыытар. Хамаҕатта Саха-француз лицейин үөрэнээчилэригэр, Францияттан кэлэн үлэлиир учууталларга саха төрүт үгэһин билиһиннэрэр. Мария Николаевна бэйэтин бырайыагын чэрчитинэн үлэтин холбоон, 98 улахан тэллэх сөрүө, 189 кыра сөрүө олбох, 91 күн сөрүө олбох оҥоһуллубут.
«Уруйдан, Дьөһөгөй оҕото!» быыстапка аһыллыытыгар Хамаҕатта нэһилиэгин баһылыга Евгений Ушницкай, Нам улууһун культуратын управлениетын специалиһа Мотрена Платонова, Намнааҕы история уонна этнография түмэлин салайааччы Александр Копырин, Хамаҕатта “Түһүлгэ” норуот айымньытын киинин специалиһа Оксана Кудрина, Намнааҕы Олоҥхо дьиэтин дириэктэрэ Вера Колпашникова, Мария Николаевна ыкса алтыһар дьоно-сэргэтэ, үөрэнээччилэрэ кыттыыны ыллылар. Кинилэр истиҥ-иһирэх эҕэрдэ тылларын этэн туран, сэмэй бэлэхтэрин туттардылар. Тэрээһини түмэл специалиһа Мария Петрова иилээн-саҕалаан ыытта.
Быыстапканы үөрүүлээхтик аһар аалай лиэнтэни Мария Аманатова, Мотрена Платонова уонна Александр Копырин быстылар. Ол кэнниттэн тоҕуоруһа мустубут дьон, быыстапкалыыр саалаҕа киирэн, кэрэ, тупсаҕай, хатыламмат оҥоһуктары сөҕө-махтайа көрдүлэр. «Уруйдан, Дьөһөгөй оҕото!» быыстапка 10 күн устата көрдөрүүгэ туруоҕа.
Майя Федорова