Ленскэй нэһилиэк олохтоохторо киин баанньыкка атырдьах ыйын бүтүүтэ сылдьан саҕалыахтара. Бүгүҥҥү күҥҥэ Намнааҕы киин баанньыкка ремонт үлэтэ ыытыллар.
Бүгүн киин баанньыкка ремонт үлэтэ хайдах быһыылаахтык бара турарын Ленскэй нэһилиэк баһылыга Петр Сокольников билистэ. “Намнааҕы киин баанньык аҥаар өттүгэр капитальнай ремонт ыытыллар. Манан сибээстээн, баанньык биир өттүгэр эр дьоннор уонна дьахталлар күннэрэ диэн олохтонуоҕа. Бэрээдэк быһыытынан, киин баанньык атырдьах ыйын бүтүүтэ үлэтин саҕалыаҕа”, – диир Петр Григорьевич.
Ити курдук, Намнааҕы киин баанньык ремонт үлэтин тиэтэллээхтик, ыгыынан-түүрүүнэн буолбакка, олохтоохтук оҥорон киллэрэрэ барыбытыгар ордук.
Маны тэҥэ, нэһилиэнньэҕэ Намнааҕы педагогическай колледж баанньыга үлэлиир эбит. Ол эрээри, ити эргин олорор дьон колледж быйыл баанньыгын үлэлэппэтин туһунан үһү-тамах курдук истэннэр долгуйалларын биллэрэллэр.
“И. Винокуров аатынан Намнааҕы педагогическай колледж баанньыгын үлэтэ кэлин тохтуу сылдьыбыт кэмигэр нэһилиэнньэттэн элбэх этии киирэн турардаах. Ол курдук, Ленскэй нэһилиэк олохтоох дьаһалтата кэпсэтии таһааран, баанньык материальнай баазатын сайыннарарыгар улуустааҕы депутаттар сэбиэтэ чэпчэтии көрөргө быһаарыныы ылыммыта. Быйыл баанньык үлэлиэҕэ”, – диэн быһаарар баһылык Сокольников.
Харысхан Попов