Бүгүн, кулун тутар 15 күнүгэр, Дойду президенин быыбарын бастакы күнэ саҕаланна. Хатыҥ Арыы нэһилиэгин үс бөһүөлэгинэн уопсайа 1830 быыбардааччы баар, ол иһигэр: Аппааныга – 1238, Кыһыл Дэриэбинэҕэ – 168, Граф Биэрэгэр – 424. 342 №-дээх Аппааны сэлиэнньэтин «Чороон» норуот айымньытын киинигэр быыбардыыр учаастак бэрэссэдээтэлэ Мария Бугаева, Граф Биэрэгинээҕи 343 №-дээх быыбардыыр учаастак бэрэссэдээтэлэ Эдита Софронова, Кыһыл Дэриэбинэтээҕи 344 №-дээх быыбардыыр учаастак бэрэссэдээтэл Кэскилээнэ Сивцева үлэлииллэр.
Бу күн УИК-тарга графигынан общественнай кэтээн көрөөччүлэр: Аппааныга Розалия Габышева, Надежда Белолюбская, Граф Биэрэгэр Анжелика Алексеева, Анастасия Григорьева, Кыһыл Дэриэбинэҕэ Степанида Черноградская, Анжелика Герасимова-Сивцева олоруохтара.
Быыбардыыр учаастактар иһитиннэрбиттэринэн, Граф Биэрэгэр бастакы быыбардааччы Валерий Евстафьев, онтон эдэр бастакы быыбардааччы техникум устудьуона Лилиана буоллулар, Намнааҕы техникум устудьуоннара быыбарга көхтөөхтүк тахсалларын бэлиэтээтилэр. УИК-тарга бэлиэтииллэринэн, нэһилиэк олохтоохторо сахалыы таҥастаах быыбардыы кэлэллэр.
Надежда Сивцева