Хамаҕаттаҕа Анна Захаровна Заровняева салайааччылаах наставник сэбиэтэ төгүрүк сыл үлэлээн кэллэ. Сэбиэт үлэтигэр нэһилиэк тэрилтэлэриттэн, араас эйгэттэн Посельская Александра Лукинична, Евсеева Антонина Даниловна, Жиркова Елена Николаевна, Назарова Дария Максимовна, Габышева Галина Федоровна,
Максимов Иван Николаевич, Колпашников Ариан Васильевич кыттыыны ыллылар.
Бүгүн Наставник күнүгэр даҕатан, Анна Заровняева сүрүн үлэлэрин сырдатар:
— Сыалбыт, үлэбит бэйэбит тэрээһин ыытыы диэн буолбакка, тэрилтэлэргэ, түмсүүлэргэ этии киллэрэн, дьону хамсатыы, сүбэ-ама оҥоруу буолбута. Ол чэрчитинэн орто оскуолаҕа «Эбээ, эһээ уруоктара» диэн ааттаан икки төгүллээн уруоктары тэрийэн ыыттыбыт.
Бастаан алын сүһүөх кылаас оҕолоругар сахалыы сиэр-туом, оонньуулар, төрөөбүт тыл туһунан этэ. Манна «Барахсаана» түмсүү чилиэннэрин, төрөппүттэри кытыннарбыппыт. Иккис сырыыга орто оскуола үбүлүөйүнэн сибээстээн выпускниктары кытта көрсүһүүлэри, кылаас чаастарын ыытыахха диэн этии киллэрбиппитин өйөөбүттэрэ. Бэртээхэй көрсүһүүлэр ыытыллыбыттара. Манна наставник, ветеран учуутал Посельская Александра Лукинична сүрүннээбитэ, оскуолаттан дириэктэри иитэр үлэҕэ солбуйааччы Елизавета Дунаева, библиотекарь Яна Петрова тэрийсибиттэрэ.
Нэһилиэк иһинэн «Бастыҥ олбуор» күрэҕи, элбэх ыалы хабар инниттэн, усулуобуйатын саҥардан ыытарга этии киллэрбиппит өйөммүтэ. Общественность сэбиэтин председателэ Саргылана Зоирова иилээн-саҕалаан ыыппыта.
«Үрүҥ көмүс волонтердар» акцияны салгыы ыытарга диэн этиибит общественность былааныгар киирбитэ. «Эркин» аҕа түмсүүтэ сүбэлэрбитин ылынан тэрээһиннэри ыытта. Бэйэбит саас М.К. Аммосов аатынан государственность музейыгар Хатырыкка баран экскурсиялаан кэлбиппит. Буолар тэрээһиннэргэ спонсорскай көмө оҥорбуппут.
Улахан ситиһиибит диэн урукку сылларга наставниктаабыт дьоммутун норуот билиитигэр таһааран, улуустааҕы, олохтоох хаһыаттарга, кинилэр үлэлээн ааспыт олохторун сырдатыы буолла. Ону таһынан улууска тахсар «Эҥсиэли хочотун үтүөҕэ уһуйааччылара» кинигэҕэ 13 киһини киллэттэрдибит. Ахтыы хомуйуутугар Габышева Галина Федоровна, Максимов Иван Николаевич, Назарова Дария Максимовна, Евсеева Антонина Даниловна үлэлэспиттэрин бэлиэтиэн этэбин. Кинигэ бу күннэргэ «Көмүөл» кинигэ кыһатыгар бэчээттэнэн кэлиэхтээх.
Наставник сэбиэтэ нэһилиэк баһылыгын, общественность сэбиэтин кытта сибээһи тутан үүммүт сылга салгыы үлэлиир былааннаах. Тохсунньу 31 күнүгэр улууска Наставник сылын түмүктүүр тэрээһиҥҥэ кыттаары бэлэмнэнэ сылдьар.
Мария Винокурова