Нэһилиэнньэ олоҕун тупсарар сыаллаах

Бэҕэһээ, өрөбүл күн, Нам улууһун баһылыга Юрий Слепцов тутуу ыытылла турар эбийиэктэрин көрдө-иһиттэ. Кинини кытта тутууну сүрүннүүр улуус депутата Андрей Гоголев сырытта. Бу туһунан “Нам улууһа” МТ пресс-сулууспата иһитиннэрэр.

Бастаан Түбэ нэһилиэгэр тиийэн тутулла турар быыһыыр сулууспа саҥа дьиэтин көрдүлэр. Нэһилиэк баһылыга Григорий Гуляев үлэ хайдах баран иһэрин кэпсээтэ. Эргэ хочуолунайы өрөмүөннээн, оскуола мастарыскыайа оҥоруон баҕалааҕын эттэ.

Кэлэн иһэн Маймаҕаттан Хатырыкка диэри суол өрөмүөнүн көрдүлэр. Салгыы Хатырык нэһилиэгэр элбэх хайысхалаах киин тутуутун билистилэр. «Намстрой» СМУ ХЭТ генеральнай директора Вадим Кутуков уонна кини үлэһиттэрэ эбийиэк хаһан киириэхтээҕин, туох-ханна буоларын сиһилии кэпсээтилэр. Нэһилиэк баһылыга Юрий Дьяконов эбийиэк үлэҕэ киирдэҕинэ хааччыллыытын боппуруостарын ыйыталаста.

Модут нэһилиэгэр оскуола тутуутун хаамыытын нэһилиэк баһылыгын солбуйааччы Мария Суздалова билиһиннэрдэ.

Бөтүҥ нэһилиэгэр икки элбэх квартиралаах дьиэни көрдүлэр. Сотору кэминэн үлэҕэ киириэхтээхтэр. Ону сэргэ, почта капитальнай өрөмүөнэ ыытылла турарын билистилэр.

Хатыҥ Арыы нэһилиэгэр элбэх квартиралаах дьиэни «Прогресс» ХЭТ тута сылдьар. Үлэ 65% буолла диэн туран, үлэһиттэр кэрийэ сылдьан кэпсээтилэр.

Күн иккис аҥаарыгар Ленскэй нэһилиэк баһылыга Петр Сокольников, специалистар Василий Сыроватский уонна Сандал Флегонтов буолан элбэх квартиралаах уонна тулаайах оҕолорго анаммыт дьиэлэри, национальнай көрүҥнэргэ анаммыт киин тутууларын уонна нэһилиэк иһинээҕи суоллар өрөмүөннэрин билистилэр. Юрий Иннокентьевич үлэ хаачыстыбатын хайаан да хонтуруоллуу сылдьалларыгар, бириэмэтигэр киирэллэригэр, нэһилиэнньэ олоҕун тупсарарга сыаллаах үлэлииллэрин тоһоҕолоон эттэ.

Хаартыскалар: «Нам улууһа» МТ пресс-сулууспата

Читайте дальше