Ленскэй нэһилиэк “Нэлэгэр” түөлбэтиттэн саҥа үөрэх дьылыгар маҥнайгы кылааска киирээччи үөрэнээччилэрбитигэр уонна кинилэр төрөппүттэригэр бүгүн умнуллубат олус үчүгэй бэлиэ күн буолан ааста. Тэрээһин үрдүк таһымҥа буолла диэн түөлбэ олохтоохторо сыаналыыбыт!
Үөрэх кыһатыгар быйыл бастакы кылааска 17 оҕобут билии ыла барар. Атырдьах ыйын 30 күнүгэр нэлэгэрдэр оҕолорбут оонньуур былаһааккаларыгар 17 мас олортубут.
Бүгүҥҥү үөрүүлээх күммүтүгэр бэлэх оҥорбут, туттарбыт, мас тиэйиитигэр транспорт өттүнэн күүс-көмө буолбут бары спонсордарбытыгар дириҥ махталбытын тиэрдэбит. Махтал тыллары викторина, остуол оонньууларын уонна көхтөөх оонньуулары ыытан кырачааннарбытыгар мэтээл, грамота туттарбыт Намнааҕы оҕо модельнай библиотекатын коллективыгар аныыбыт. Ону тэҥэ, оонньууну бэйэтин көҕүлээһининэн тэрийбит улуустааҕы хотугу хаамыы федерациятын председателигэр Дмитрий Елисеевка махтанабыт.
Түөлбэбит олохтоохторугар, материальнай көмөтүн иһин Романова Дарья Михайловнаҕа, биһиги микрооройуоммут актыыбыгар Сидорова Анна Елисеевнаҕа, Колодезникова Валентина Михайловнаҕа, Ядреева Анастасия Гаврильевнаҕа, Петровтар дьиэ кэргэттэригэр, тэрээһиннэргэ кыттыыны ылар баар суох соҕотох бастыҥ аҕабытыгар, Васильев Добун аҕатыгар Васильев Егор Николаевичка махтал тылларын аныыбыт.
Оҕолорбут инникитин сыаллаах-соруктаах, нэһилиэк, улуус, өрөспүүбүлүкэ патриоттара, өй-санаа, дьоһун-мааны, үтүө майгылаах дьон буола улааттыннар.
Оҕолорбутунан, түөлбэ олохтоохторунан киэн туттабыт!
“Нэлэгэр” түөлбэ актива
Нэһилиэнньэттэн санаалар:
- “Нэлэгэр” микрооройуон активыгар үрдүк таһымнаах тэрээһин иһин улахан махтал! Оҕолор оонньоон, күрэхтэһэн, үөрэн аҕай кэллилэр. Грамоталара, мэтээллэрэ, бэлэхтэрэ – бэртээхэй!
- Тэрийээччилэргэ, спонсордарга, тэрээһиҥҥэ кыттыспыт дьоҥҥо улахан махтал. Оҕом подарогар үөрэн аҕай кэлбит. Хата аҕабыт оруобуна кэлэн уолун кытта барсан, оҕом үөрэ-көтө сылдьан кэллэ.