Бойобуой дьайыы бэтэрээнэ, өрөспүүбүлүкэтээҕи «Үс Түмсүү», улуустааҕы «Буойун» түмсүү чилиэнэ Николай Протопопов 2022 сыллаахтан ыла бэйэтин көҕүлээһининэн оҕолорго үөрүүнү үксэтэр үтүө үгэстээх.
Бүгүн Николай Леонидович «Берегиня» дьиэ кэргэҥҥэ иитиигэ көмөлөһөр өрөспүүбүлүкэтээҕи киин Намнааҕы салаатын иитиллээччилэригэр анаан 19 устуука Саҥа дьыллааҕы бэлэҕи туттарда. Давид Архан салайааччылаах «Үс Түмсүү» чилиэннэрэ бэйэлэрин кылааттарын киллэрэн күүс-көмө буолбуттар.
Санатан аастахха, ааспыт сылга Николай Протопопов оҕолорго үөрүүнү үксэтээри, дьиэ кэргэн санаатын бөҕөргөтөөрү Нам улууһуттан анал байыаннай операцияҕа кытта сылдьар байыастар, саллааттар оҕолоругар биир санаалаахтарын кытары Саҥа дьыллааҕы бэлэҕи туттартаабыта. Итиэннэ коронавирус дьаҥа турбутугар бэйэтин этиитин этэн, көҕүлээн Павел Оконешников салайааччылаах «Буойун» түмсүү чилиэннэрэ биир санааҕа кэлэннэр, Партизаҥҥа элбэх оҕолоох дьиэ кэргэн икки үөрэнээччитигэр планшет бэлэхтээбиттэрэ, үгүс дьоҥҥо бородууктанан көмөлөспүттэрэ.
Үтүө санаалаах биир дойдулаахпыт Николай Протопопов билигин дуогабарынан «Алмаз Анабара» үлэлиир-хамсыыр.
Семен Аргунов