Нам улууһугар СӨ правительствота 2023 сыллааҕы үлэтин отчуоттаабыта үһүс күнэ.
Ол курдук, Гаврил Кириллин салайааччылаах үһүс бөлөх отчуоту Никольскайтан саҕалаата.
Россия Президенэ Владимир Путин Саха сиригэр улахан болҕомто уурар. Ил Дархан Айсен Николаев сөптөөх үлэ ыытарыттан, Нам улууһугар Уһук Илин суох инбэлииттэр уонна кырдьаҕастар дьиэлэрин, Тааттаҕа үчүгэй хааччыллыылаах поликлиника тутуутун ситиспитэ. Сотору кэминэн, тыа сирдэригэр олох хаачыстыбата тупсарыгар тутуулар өссө да ыытыллыахтара. Бу буолар, дьон-сэргэ тылын истии, олоххо киллэрии.
«Нам улууһугар протоколга 179 боппуруос киирбититтэн, Никольскайга 16 ыйытыы киирбит. Мантан биир боппуруос туолбут.
Сүрүн туруорсуулар — саҥа оскуола-саад, фельдшерскай-акушерскай пуун тутуулара буолаллар» — диир Нам улууһун куратора Гаврил Витальевич.
Оскуола-саад тутуутугар улуус салалтатын кытта үлэлэр ыытылла туралларын баһылык Алексей Кривогорницын быһаарар.
«Тыа хаһаайыстыбатыгар түһүү-тахсыы. Бүгүҥҥү күҥҥэ ынах-сүөһү ахсаанын түһэрбэт туһунан сыал-сорук туруоруохтаахпыт. Сүөһүнү иитэр кэтэх хаһаайыстыбалаах дьоммут орто сааһа 60-62 саас. Ол иһин, улууска кооперация тэрийиитигэр үлэлэр ыытыллаллар», — диир тыа хаһаайыстыбатыгар улуус баһылыгын солбуйааччы Филипп Николаев.
Мантан таһаардахха, тыа хаһаайыстыбатыгар көмө баар. Нэһилиэнньэ өттүттэн үлэлээһин ирдэнэр. Бу барыларыгар сыһыаннаах, эдэр, орто саастаах дьоҥҥо туһуланар.
Тыа хаһаайыстыбатынан дьарыктаныан баҕарааччылар, саҕалааччылар субсидия көрүллэригэр ыарахаттары көрсөллөрүн хас да нэһилиэккэ этэн аһарбыттара.
Ол эрээри, тыа хаһаайыстыба салаатыгар саҥа саҕалааччы фермердар федеральнай программалларга хапсалларыгар, көмө ылалларыгар хааччахтара наһаа элбэҕэ, уустуга бэлиэтэнэр.
Өссө биирдэ, нэһилиэктэр доруобуйаларын көннөрүнэллэригэр тустаах дьиэлэргэ наадыйаллар. Нам улууһун нэһилиэктэрэ врачебнай амбулатория, фельдшерскай-акушерскай пуун тутуутун туруорсаллар.
Никольскай дьоно-сэргэтэ Хамаҕаттаҕа тиийэн доруобуйаларын көрдөрүнэллэрин ыарырҕаталлара билиннэ. Бииринэн буолар, кыһыҥҥы тымныыга суолга туруу.
Туруорсуулар протоколга киирдилэр. Үлэлэр салгыы ыытыллаллар.
Харысхан Попов