«Берегиня» дьиэ кэргэҥҥэ иитиигэ көмөлөһөр киин Намнааҕы салаата былаан быһыытынан сэтинньи 15 күнүттэн саҕалаан Оҕо быраабын аан дойдутааҕы күнүгэр анаан араас хайысхалаах тэрээһиннэри ыытта.
Сэтинньи 16 күнэ. Улуус оскуолаларын үөрэнээччилэрин кытта Намнааҕы ИДьУО сотрудниктара кыттыылаах көрсүһүү тэрийбит. Барыта 63 оҕо сылдьыбыт. Полиция майора, ПДН инспектора Любовь Атласова профилактическай бэсиэдэтигэр бытархай күлүгээннээһин, табахтааһын, арыгылааһын иһин туох миэрэҕэ тардыллыахха сөбүн кэпсээбит. Оттон полиция майора Ольга Павлова общественнай транспорга, суолга быраабылалар туһунан билиһиннэрбит уонна тас таҥаска хараҥаҕа сырдаан көстөр элеменнэр наадаларын кэпсээбит. Түмүгэр, Ольга Александровна викторина ыыппытыгар, оҕолор улахан аҥаардара сөпкө эппиэттээбиттэр. Полиция майора, криминалист-эксперт А.В. Мартынов «Криминалист чымадаанын» билиһиннэрбит, буруйу оҥоруу суолун-ииһин чинчийэр, көрдүүр прибордарын, инструменнарын көрдөрбүт.
Оҕолор ордук Макаров бэстилиэтин уонна Калашников аптамаатын ыһыы-хомуйуу түгэнин интэриэһиргээбиттэр.
Сэтинньи 17 күнэ. Нам улууһун прокурорун көмөлөһөөччүтэ Людмила Антонова оскуола оҕолорун уонна Намнааҕы педколледж устудьуоннарын кытта көрсүбүт. Манна барыта 43 оҕо кыттыбыт. Прокурор көмөлөһөөччүтэ «Твои права – твоя ответственность» диэн тиэмэҕэ бэсиэдэ аахпыт. Оҕолор бу көрсүһүүнү олус интэриэһиргээбиттэр. Көхтөөхтүк ыйытыы биэрбиттэр уонна кэпсэтиигэ кыттыбыттар. Ордук буруйу оҥоруу иһин хас саастан эппиэтинэскэ тардыллары, маныаха сокуонунан ханнык холуобунай эппиэтинэскэ тардыллыахха сөбүн сураспыттар. Бу күн Намнааҕы оҕо библиотеката (сэб. В.Е. Бережнева) «Я и мои права» диэн оонньуу, «Бининс» устудьуоннар педагогическай этэрээттэрэ (сал. Н.А. Суздалова) «Преступления и правонарушения в мультфильмах» диэн интерактивнай викторина ыыппыттар.
Киин специалистара оскуола орто сүһүөх үөрэнээччилэригэр «Знаем ли мы свои права?» онлайн-викторина тэрийбитигэр 26, улахан кылаас үөрэнээччилэригэр «Уровень правовой культуры» анкета толорторбуттарыгар 41 оҕо кыттыыны ылбыт.
Сэтинньи 20 күнэ. ОГИБДД сотрудниктара (полиция лейтенана В.В. Баишев, мл. лейтенант Е.П. Слепцов) Нам 3 №-дээх орто оскуолатын үөрэнээччилэригэр «Дети. Дорога. Безопасность» диэн суолга профилактическай акция ыыппыттар. Автоинспектордар уонна кинилэр эдэр көмөлөһөөччүлэрэ суоппардары сэрэхтээх уонна болҕомтолоох буоларга, суол быраабылатын тутуһарга ыҥырбыттар, тематическай өйдөбүнньүк туттарбыттар. Суоппардар оҕолор уонна инспектордар ыҥырыыларын үөрэ ылыммыттар.
Бу курдук Оҕо быраабын аан дойдутааҕы күнүн чэрчитинэн үгүс тэрээһин ыытыллан, сокуоннай саастарын ситэ илик оҕолор политическай култууралара сайдарыгар көмөлөспүт.
Сахаяна КОКАРЕВА, «Берегиня» киин специалиһа