“Движение первых” Бүтүн Россиятааҕы оҕо хамсааһынын Намнааҕы салаата, салайааччы Анна Ядрихинская, «Жизнь БЕЗопасности» бырайыагынан партнердарын кытта профилактическай десант тэрийдилэр.
Дьокуускайтан Бүтүн Россиятааҕы добровольческай баһаарынай общество өрөспүүбүлүкэтээҕи отделениета, СӨ быыһыыр сулууспата, Намнааҕы ОГПС сотрудниктара оскуолаларынан сылдьан бастакы көмөнү хайдах оҥорорго, куттал суох буолуутун туһунан бэсиэдэлэри оҥорбуттар, квест-оонньуу ыыппыттар. Ол курдук, Е.М. Шапошников аат. Хамаҕатта орто оскуолатыгар, В.П. Артамонов аат. саха-француз лицейигэр сылдьыбыттар.
Маннык профилактическай үлэ көрүҥэ оҕоҕо туһалаах үөрүйэхтэри, билиини-көрүүнү иҥэрэр, олох араас ыарахаттарыгар бэлэмниир. Барыта 206 үөрэнээччи хабыллыбыт. Инникитин даҕаны маннык десаннар ыытыллыахтара.
Ю.Ю. Ядрихинская, Бүтүн Россиятааҕы добровольческай баһаарынай общество өрөспүүбүлүкэтээҕи отделениетын үлэһитэ:
— Бүтүн Россиятааҕы добровольческай баһаарынай общество өрөспүүбүлүкэтээҕи отделениета СӨ быыһыыр сулууспатын, Намнааҕы ОГПС сотрудниктарын кытта «Жизнь БЕЗопасности» диэн “Движение первых” хамсааһын Намнааҕы салаатын көҕүлээһининэн, «Первая помощь» Бүтүн Россиятааҕы бырайыак чэрчитинэн тэриллибит профилактическай десаҥҥа кытынныбыт. Оҕолор араас ыксаллаах балаһыанньаҕа практическай үөрүйэхтэри кэлимник ылалларыгар олус туһалаах тэрээһин буолла.
“Движение первых” Бүтүн Россиятааҕы оҕо хамсааһынын Намнааҕы салаатын салайааччыта Анна Ядрихинская десант партнердарыгар, оскуола салалтатыгар бырайыагы өйөөбүттэригэр махталын тиэрдэр.
Лена Ноговицына