Сайын улаатан эрэр оҕолор дьарыктаах буолаллара бэйэлэригэр да, төрөппүттэргэ да улахан суолталаах.
Нам сэлиэнньэтигэр “ЭкоНам” сервиснэй этэрээт оҕолоро сэлиэнньэ ыраас, тупсаҕай көрүҥнэнэригэр ылсан үлэлииллэр. Уопсайа үс сезонунан: бастакы сезоҥҥа Нам 1 нүөмэрдээх оскуолатыгар “Эрэл” волонтер этэрээтэ, иккис, үһүс сезоннарга “ЭкоНам” сервиснэй этэрээт үлэлииллэр.
Салайааччы Анна Слепцова иһитиннэрбитинэн, сервиснэй этэрээт 2014 сыллаахтан тэриллэн үлэлиир. Быйыл 14 саастарыттан 50 оҕо 3 ый суһал үлэ дуогабарын баттаста. “Временное трудоустройство несовершеннолетних” диэн Бүтүн Россиятааҕы программа чэрчитинэн, дьарыктаах буолуу киинтэн уонна Ленскэй нэһилиэктэн үлэлэрин чааһыгар сөп түбэһэр хамнастаналлар. Сүрүннээн, ырааһырдыыга, көҕөрдүүгэ сылдьаллар: Нам сэлиэнньэтин уулуссаларын бөхтөн ыраастыыллар, сквердэргэ сибэккилэргэ уу куталлар. Холобура, бүгүн 46 куул бөх хомуйдулар. Бастакы сезоҥҥа 404 куул бөх хомуллубут.
Маны таһынан оҕолор социальнай эксперименнэри тэрийэллэр, улууспут тэрилтэлэрин кытта араас акциялары оҥороллор. Холобура, ГИБДД, баһаарынайдары кытта профилактикаҕа, сэрэхтээх буолууга бииргэ үлэлэһэллэр.
Дарина Константинова