Бүгүн Аан дойдуга Оҕо кинигэтин күнүнэн сэдиптээн, оҕолор ханнык кинигэлэри сөбүлээн ааҕалларын, ханнык жанрдары, ааптардары интэриэһиргииллэрин бибилэтиэкэрдэртэн билиэҕиҥ.
Яна Петрова, Е.М. Шапошников аатынан Хамаҕатта орто оскуолатын бибилэтиэкэрэ:
— Араас энциклопедиялары көрөллөр, туһаналлар, техниканы, кыыллары, саха сирин үүнээйилэрин сэргииллэр. Мүччүргэннээх сырыылар туһунан сөбүлээн ааҕаллар. Б. Тобуруокап, И. Иринцеева-Огдо, А. Борисова, В. Габышева кинигэлэрин биһирииллэр.
Надежда Местникова, В.П. Артамонов аатынан саха-француз лицей бибилэтиэкэрэ:
— Буоларын курдук, кыра кылаас оҕолоро остуоруйалары, энциклопедиялары, харахха хатанар үчүгэй тастаах, уруһуйдаах кинигэлэри ааҕаллар. Орто, улахан кылаас оҕолоро үөрэтэр учууталлара сүбэлээбит, ирдээбит литератураларын уларсаллар. Бибилэтиэкэбитигэр саха, нуучча, омук классик суруйааччыларын кинигэлэрэ балайда бааллар. Хомойуох иһин, оскуола бибилэтиэкэлэригэр уус-уран кинигэлэр кэлбэт буолбуттара олох ыраатта. Онон фондабыт бэлэх акциянан эрэ байытыллар.
Марина Корякина, нэһилиэк бибилэтиэкэрэ:
-Оҕолор үксүн муода буолбут манга — японскай комикстары, ойуулардаах, сорудахтаах кинигэлэри сөбүлээн ааҕаллар. Саамай кыралар «Сто окошек» серияны интэриэһиргииллэр. Элбэх ҫиэдэрэй ойуулаах саҥардыллан тахсыбыт кинигэлэр оҕо болҕомтотун тардаллар.
Мария Винокурова