Оҕолорго Саҥа дьыл тыынын саҕабыт

Сэтинньи 18 күнүгэр Россияҕа Моруос Оҕонньор төрөөбүт күнүн бэлиэтээтибит. Улуу Устюгка, кини күн сирин көрбүт сиригэр, үгэскэ кубулуйбут бырааһынньык тэриллэр. Ону кытары биһиги эмиэ иитиллээччилэрбитигэр кэһии тутуурдаах Моруос Оҕонньор ыалдьыттаах Саҥа дьыл тыынын саҕабыт. 

Моруос Оҕонньор персонаһа славянскай мифологияттан кэлбит. Тымныыны ыҥырар маҥан бытыктаах оҕонньор өс хоһоонноругар, остуоруйаларга көстөр. Кинини оччолорго «Студенец», «Трескунец» диэн ааттыыллара.

Моруос Оҕонньор оҕолорго 1937 сыллаахха Сойуустар дьиэлэрин Дьуолкатыгар кэлбит эбит. Үүнэр көлүөнэ кинини наһаа сөбүлээбит, сырдыгы, ырааһы, кэрэни, дьоллоох кэми кытта тэҥниир буолбуттар.

Бу бэлиэ күн чэрчитинэн Аппааны «Хатыҥчаана» 1-кы №-дээх оҕо сайдар киинигэр «Хаар баала» диэн аралдьытыы тэрээһини ыыттыбыт. Хаарчаана кыыс кэлэн эһээтин туһунан билиһиннэрдэ, иитиллээччилэргэ кэһии тутуурдаах кэлэн иһэр илдьитин тириэртэ. Кырачааннарга үөрүүнү-көтүүнү саҕар, минньигэс арааһа, оонньуур эгэлгэтэ кэһиилээх тиийэн кэлэр Моруос Оҕонньор төрөөбүт күнүнэн ыллаан, үҥкүүлээн, саха төрүт музыкатын инструменын тыаһатан, оонньоон-көрүлээн аастыбыт.

Саҥа дьыл бырааһынньыгын түстүүр Моруос Оҕонньорго анаан өссө элбэх ырыа, хоһоон, үҥкүү үөрэтиэхпит.

Варвара Аргунова, иитээччи

Читайте дальше