Нам улууһун “Олимпик” спорт оскуола боксер, кикбоксер оҕолоро 2024 сылы ситиһиилээхтик түмүктээтилэр.
Ол курдук, ахсынньы 16-20 күннэригэр Станислав Потапов кэриэһигэр боксаҕа буолбут аһаҕас турнирга Татаринов Айхал кыһыл көмүс, Семенов Никита үрүҥ көмүс, Былгаев Алексей, Олесов Леонид, Максимов Артур, Николаев Альберт, Дьячковскай Дархан боруонса мэтээллэри ылбыттарын дириэктэр Изабелла Массаева этэр. Боксер уолаттары Дмитрий Захаров уонна Николай Иванов дьарыктыыллар.
Станислав Потапов кэриэһигэр ыытыллыбыт турнирга “Олимпик” спорт оскуола выпускнига Радислав Черноградскай таһымнаахтык судьуйалаабытын иһин махтал суругунан бэлиэтэммит.
Ону тэҥэ, “Олимпик” кикбоксердара ахсынньы 20 күнүгэр Моруос Оҕонньор бирииһигэр ыытыллыбыт кикбокса аһаҕас турнирыгар Протопопов Дамир, Павлов Марк кыһыл көмүс, Турантаев Данил, Замятин Стас, Павлов Радомир үрүҥ көмүс, Винокуров Ваня боруонса мэтээллэри кэппиттэр. Кикбоксердар Дмитрий Черноградскай, Захар Румянцев салалталарынан эрчиллэллэр.
Нам улууһун эдэр боксердара Ленскэй куораттан 2 боруонса мэтээли аҕалан иһэллэрин Изабелла Сергеевна иһитиннэрэр. Ол курдук, ахсынньы 19-22 күннэригэр Н.П. Габагуев уонна С.В. Храмцов кэриэстэригэр боксаҕа V төгүлүн ыытыллар аһаҕас турнирга Дмитрий Захаров уолаттара Олесов Артем, Николаев Ярик бочуоттаах үһүс миэстэ буолары ситиспиттэр!
“Эдэр боксер, кикбоксер оҕолорбут, эрэллээх иитиллээччилэрбит сылаалаах айаны аахсыбакка таһымнаах боксаны көрдөрөллөр! “Олимпик” спорт оскуола бары иитиллээччилэринэн киэн туттар.
Тренердэри барыларын эҕэрдэлээн туран, кэлэр сыл барыбытыгар ситиһиилээх буоллун”, – диир дириэктэр Изабелла Массаева.
Харысхан Попов