Нам улууһун аатыттан түөрт боксер Бүлүү куоратыгар күрэхтэһэн ситиһиилээх кэллилэр. Ол курдук, Норуоттар Сомоҕолоһууларын күннэригэр сөп түбэһэннэрэн, алтынньы 2-4 күннэригэр “Олимпик” спортивнай оскуола иитиллээччилэрэ “Бүлүү куорат” бирииһигэр буолбут боксаҕа күрэххэ 3 кыһыл көмүс уонна боруонса мэтээллэри кэттилэр.
Ксенофонтов Сандал, Петров Эрхан, Максимов Артур бэйэлэрин ыйааһыннарыгар күүстээх боксер буолалларын көрдөрөллөр. Оттон Николаев Алик үһүс бочуоттаах миэстэҕэ тахсан турда. Ону тэҥэ, турнир түмүгүнэн Ксенофонтов Сандал “Турнир бастыҥ боксера” анал ааты ылбыт.
“Иитиллээччилэрбитин боксаҕа ситиһиилэммиттэринэн уонна тренер Николай Иванову эҕэрдэлиибин.
Алтынньы 14 күнүгэр Иннокентий Окоемов уолаттарынаан, Саха-француз лицей 8-9 үөрэнээччилэрэ ини-бии Арылхан уонна Арчылан Харатаалалары кытта Улан-Үдэ куоракка бүтүн Арассыыйатааҕы гиревой спорт турнирыгар айаннаары күүстээх дьарык ааһаллар. Үтүөлээх спорт маастара Сергей Леонов бирииһигэр ыытыллар турнирга “Олимпик” оскуола иитиллээччилэрэ үһүс сырыыларын кыттыахтара”, – диэн кэпсиир дириэктэр Юрий Балаганскай.
