Сэрии бэтэрээнэ Осипов Афанасий Авксентьевич оҕолоро ис сүрэхтэриттэн кыһаллан, дириҥ ис хоһоонноох, бары өттүнэн сиппит-хоппут, бэркэ таҥыллыбыт, киһини эрэ астыннарар, дуоһутар аҕаларын, эһэлэрин сырдык кэриэһигэр, 100 сааһын бэлиэтээн 2 Хомустаах нэһилиэгин дьонугар «Олоҕум үлэни өрө тутарга үөрэппитэ» дьоро күнү тэрийдилэр. Чуолаан, Афанасий Авксентьевич улахан кыыһа Александра Афанасьевна иилээн-саҕалаан, сүүрэн-көтөн, ахтыы ылан, слайдаҕа театр артыыстарын кэпсэтэн, аҕатын үлэтин-хамнаһын сырдатан, ол кэмнээҕи кэми арыйан көрдөрбүтэ көрөөччүлэри долгутта да, сонун көстүү да буолла.
Тэрээһини нэһилиэк библиотекара Слепцова Елена Васильевна салайан ыытта, киниэхэ улахан кыыһа Александра Афанасьевна сэргэстэһэ олорон көмөлөстө. Ахтыы киэһэ бэрт сэргэхтик, иһирэхтик буолла, иэйиилээх ырыалар ылланнылар.
Бу курдук олорон ааспыт ытык дьоннорбут оҕолоро дьонноругар дириҥ убаастабыллара, кинилэринэн киэн туттуулара, холобур оҥостоллоро, сүгүрүйэллэрэ — махтанар ытык иэстэрин туоһута буоллаҕа… Нэһилиэкпитигэр буолан ааспыт ахтыы күннэрин умнубаппыт. Ол курдук, В.В. Замятин, М.Н Артемьев, С.А Местников, Н.П. Габышев, Н.М. Осипов, Е.А. Габышева, Н.Д. Протопопов уо.д.а. оҕолоро, ыччаттара эмиэ бэлиэтээбиттэрэ. Ким да, туох да умнуллубат. Салгыы маннык тэрээһиннэр буола туруохтара. Көлүөнэни көлүөнэ солбуйар, олох салҕанар…
Тэрээһин үөрүүлээх чааһын кэнниттэн салгыы остуол тула олорон ыҥырыылаах ыалдьыттар, оҕолоро, сиэннэрэ, бииргэ алтыспыт нэһилиэгин дьоно, Афанасий Авксентьевич аймахтара, кэргэнин Александра Алексеевна чугас дьоно үтүө киһини, ол ааспыт кэм үтүө өйдөбүлгэ хаалбыт түгэннэрин иһирэхтик, истиҥник ахтан-санаан аастылар. Сиэннэрэ эһэлэрэ эппит кэс тылын, сүбэтин-аматын өйдүү-саныы сылдьалларын долгуйа аҕыннылар…
Нэһилиэкпитигэр ити курдук Афанасий Авксентьевич Осипов 100 сааһыгар былааннаммыт тэрээһиннэр үрдүк таһымҥа буолан аастылар.
Оҕолоро, сиэннэрэ, аймахтара тэрээһиннэргэ күүс-көмө, өйөбүл буолбут оскуола коллективыгар, культура, библиотека, музей үлэһиттэригэр, нэһилиэктэрин олохтоохторугар улахан махталларын тиэрдэллэр.
Лидия Пестрякова