Нам сэлиэнньэтигэр «Куттала суох оскуола» диэн хайысхалаах профилактическай тэрээһиннэр буоллулар. Ол курдук, ПДН инспектордара Праскея Хусаинова, Арина Павлова уонна Ленскэй нэһилиэк саастарын ситэ илик оҕолор дьыалаларыгар, кинилэр бырааптарын көмүскүүр общественнай сэбиэт эппиэттээх сэкирэтээрэ Анна Слепцова икки күннээх лекциялары Намнааҕы 1-кы нүөмэрдээх оскуолаҕа, Хамаҕаттатааҕы саха-француз лицей үөрэнээччилэригэр ыыттылар.
Оҕолор “экстремизм”, “терроризм”, “скулшутинг” диэн тыл туох суолталаахтарын истибиттэр, билбиттэр. Холобура, оҕолор бэйэлэрин санааларын, дойдуга буола турар араас куһаҕан быһылааннар тахсалларын күүскэ утаралларын биллэрбиттэр. “Скулшутинг” биричиинэтин быһаараллар уонна бэйэ-бэйэҕэ убаастабыллаах сыһыан баар буолуохтааҕын, өйдөспөт быһыы-майгы үөскээтэҕинэ эйэлээхтик быһаарсар ордук диэн түмүккэ кэлбиттэр.
Араас сэрэхтээх саайтарга, “интернет” бөлөхтөргө оонньоон киирии, көҥүллэммэт символлары, ол иһигэр, нацизм символларын туттуу эппиэтинэскэ тардыллыахтарын сөбүн өйдөөтүлэр. Оҕолорго профилактика хайысхатынан брошюралар, буклеттар түҥэтиллибиттэр, кылаас салайааччылара үлэлэригэр тутталларыгар иһитиннэриилэр бэриллибиттэр.
Барыта холбоон 805 оҕо хабыллан иһитиннэрии ылбыт. Төрөппүттэргэ туһаайан этиэхпитин баҕарабыт, бу дьалхааннаах кэмҥэ оҕо көҥүллэммэт интернет сайтарыгар киирбэтин, сыыһа-халты туттарыттан сэрэтэр сыаллаах өйдөтүү үлэтин күүскэ ыытыллар наадалааҕын тоһоҕолуубут. Өйдөөбөтөҕүм, билбэтэҕим диэн тыллар эппиэтинэстэн босхолооботун санатабыт.
Ленскэй нэһилиэк прес-сулууспата