“Саха сирин ыччата! Биһиги бэлэммит!” Бүтүн Россиятааҕы тэрээһиҥҥэ Нам улууһун нэһилиэктэрин оскуолалара бүгүн ГТО түһүмэхтэригэр сүүмэрдиир күрэхтэһиигэ көрүстүлэр. Бастыҥнар Саха сиригэр “Муус Устар” 2024 фестивал чэрчитинэн ыытыллар “Готов к труду и обороне” күрэхтэһиэхтэрэ.
Ол курдук, Хатырыктан, 1 Хомустаахтан, 2 Хомустаахтан, Намнааҕы 1 №-дээх оскуолаттан, Ньургун Тимофеев аатынан өрөспүүбүлүкэтээҕи олимпийскай эрэл спорт оскуолатыттан 2 кыыс, 2 уол бириэмэҕэ челночнай сүүрүү, отжимание, пресс хачайдааһын, тардыныы, мэһэйдээх сүүрүү көрүҥнэрин толордулар.
Күрэхтэһиигэ 5 мүн. 46 сөк. чаҕылхай бириэмэни 2 Хомустаах үөрэнээччилэрэ көрдөрдүлэр. Хамаанда инники тахсарыгар 2 хомустаахтар кыргыттара өрө таппыттара бэлиэтэнэр. Иккис миэстэҕэ 6 мүн. 20 сөк. фиништээбит Намнааҕы 1 №-дээх оскуола (Тарская Эльвира, Тобольщина Анжела, Сивцев Миша, Ядрихинскай Кирилл) таҕыста. Оттон өрөспүүбүлүкэтээҕи олимпийскай эрэл спорт оскуола (Колесова Климентина, Данилова Илона, Малгинов Сумер, Сивцев Артем) 6 мүн. 56 сөк. кэлэн үһүс бочуоттаах миэстэни ылла.
Кыайыылаах тахсыбыт оҕолор Копырина Ньургуяна, Протопопова Василиса, Осипов Алик, Никифоров Алеша Петр Уваровскай иитиллээччилэрэ буолалларын физкултуура учуутала Иван Копырин этэр. Ол курдук, оҕолор төрдүөн Петр Романович салалтатынан мас тардыһыытынан дьарыктаналлар эбит.
Салалта күрэхтэһээччилэртэн 8 үөрэнээччини бэйэтигэр бэлиэтэннэ.
Харысхан Попов