Нам сэлиэнньэтигэр П.П. Ядрихинскай-Бэдьээлэ аатынан Намнааҕы Олоҥхо дьиэтэ уонна Ленскэй нэһилиэк олохтоох дьаһалтата “Мороз и блеск” диэн остуолга ууруллар муус фигуралар күрэҕин биллэрэр.
Ол курдук, кыттааччылар, талааннарын дьоҥҥо-сэргэҕэ көрдөрүөн баҕалаахтар муустан чочуйан оҥорбут ураты быһыылаах иһиттэрин сэтинньи 13 күнүгэр диэри Олоҥхо дьиэтигэр аҕалан туттарыахтара. Холобура, бырааһынньыктааҕы мааны остуолга уурарга анаан муустан оҥоһуллубут иһиттэргэ балык, эт бүлүүдэлэрин хото ууруохтара турдаҕа.
Нэһилиэнньэ кыһыҥҥы кэмҥэ интэриэстээх буоларыгар, “Мороз и блеск” күрэх саҥа сүүрээн быһыытынан тэриллэрин дириэктэр Вера Колпашникова иһитиннэрэр. Муустан фигура оҥоруу күрэҕэр кыттааччылар үлэлэрэ үс бөлөххө араарыллан сыаналаныаҕа: 18-тан 30 сааска диэри; 50 сааска диэри уонна 50 саастан үөһэ.
“Мороз и блеск” муус фигураларыгар киирбит үлэлэртэн бастыҥнары быһаарарга, муус оҥоһуктары айааччы-тутааччы маастардар уонна олохтоох нэһилиэнньэ быһаарыаҕа.
Талааннарын көрдөрбүттэр араас номинацияларынан, бириистэринэн наҕараадаланыахтара. Кыайыылаахтар уонна номинаннар өйдөбүнньүк дипломнары, сыаналаах бириистэри тутуохтара.
Тэрийээччилэри кытта маннык нүөмэргэ эрийэн билсиэххэ сөп: 8-914-233-44-17.