Улуус биир улахан нэһилиэгэр — Хамаҕаттаҕа Петр Сергучев салайааччылаах 10 араас эйгэттэн бэрэстэбиитэллээх бөлөх Хамаҕатта олохтоохторун иннигэр отчуота бэрт уһуннук барда.
Бастакынан, сүрүн дакылаат аныгылыы видео устуу көмөтүнэн хаартыска, видео арыаллаах диктордар кэпсээннэринэн буолла. Салгыы мунньах бэбиэскэтинэн былырыыҥҥы туруорсууларга тохтоотулар. Ол курдук, биирдиилээн ыйытыыларга эппиэт буолла, ол гынан баран уопсай анализ, түмүк оҥоһуллубата.
Үсүһүнэн, кэпсэтии, ыйытыыларга хоруй бэрээдэгинэн барда. Отчуоту бэлиэтиир чааһыгар олохтоохтор улууска ордук тутуу күүскэ барбытын, культура, спорт салаатыгар үлэ элбэҕин ыйдылар.
Кэпсэтии кэмигэр сыл аайы долгутар боппуруостар хатыланнылар: тыа хаһаайыстыбатын үлэтэ, сир реформата, биэрэк бөҕөргөтүүтэ, туризмы, урбааны сайыннарыы, саха-француз лицей интернатын өрөмүөнэ, мастерскойун тутуута, оскуола автобустарыгар эбии бензин көрүүтэ. Маны сэргэ, бюджетнэй үлэһиттэри дьиэнэн хааччыйыыга, саха-француз лицей үөрэнэр сүрүн корпуһун, МПЧ дьиэтин өрөмүөннүүргэ, саҥа кулууп тутуутун туруорустулар. «Экосети» үлэтин тупсарыы, улууска сметчик наадатын эттилэр.
Отчуокка общественнай бэрээдэк, миграннар, ыччат политиката, депутаттар үлэлэрэ сырдатыллыбатаҕын ыйан туран, тыл эппит салайааччылар Анатолий Дьяконов, Юрчана Парникова, Иннокентий Стручков, Антонина Харитонова, Валентин Абрамов, депутаттар Николай Захаров, Саргылана Васильева, Сергей Жирков, чааһынай предприниматель Василий Индеев, Айаал Сунтаров отчуоту биһирииллэрин биллэрдилэр. Хамаҕатта олохтоохторо үс чаастан ордук мунньахтаатылар, санааларын аһаҕастык этиннилэр уонна салгыы 2024 сылга саҥа ситиһиилэри баҕардылар.
Мария Винокурова