Кулун тутар 15 күнүгэр Граф Биэрэгин “Песчанка” күөлүгэр түөлбэлэр икки ардыларыгар ыытыллар “Аҕа уонна уол күрэх” үрдүк таһымнаахтык ыытылынна.
Уол оҕо төрөөбүт дойдутун, норуотун хорсуннук көмүскүүр кыахтаах уонна баҕалаах буола улаатара төрөппүттэн эрэ буолбакка, тас эйгэттэн эмиэ улахан тутулуктаах. Дойдубут патриоттарын биһиги бэйэбит иитэн, улаатыннаран таһаарабыт. Куруук олох үөһүгэр сылдьар, көхтөөх, сайдыыны, саҥаны уруйдуур аҕалар үрдүк холобур буолаллар. Аҕа—дьиэ кэргэн туллубат тулааһына, ыал модун кыаҕа, сүрүннүүр күүһэ. Кини байылыат, дьоллоох олоҕу тѳрүттээччи буолар. Бу күн сэттэ түөлбэттэн үс кыттааччы кэллэ. Ол курдук, бастакы кыттааччылар Аппааны бөһүөлэгин «Озернай» түөлбэ олохтоохторо Аркадий Дмитриевич уонна уола Оскар Соловьевтар. Аркадий Дмитриевич Намнааҕы баһаарынай чаас охрана отделениетын командира. Оскар Намнааҕы техникум сварщик идэтигэр үөрэнэр 2 куурус устудьуона. Соловьевтар элбэх оҕолоох дьиэ кэргэн буолаллар. Ааспыт 2024 сыл Партизаҥҥа ыытыллыбыт улуустааҕы Аҕа күрэҕэр 4 миэстэни ылбыттара. Иккис кыттааччылар Аппааны бөһүөлэгин «Озернай» түөлбэ олохтоохторо Петр Петрович уонна уола Денис Дьячковскайдар. Петр Петрович Намнааҕы баһаарынай чаас караул начальнига. Денис Н.С. Охлопков аатынан Намнааҕы гимназия 11-с кылаас үөрэнээччитэ. Дьячковскайдар дьиэ кэргэн нэһилиэк, улуус күрэхтэрин көхтөөх кыттыылаахтара буолаллар. Үһүс кыттааччы Аппааны бөһүөлэгин «Саһарҕа» түөлбэ олохтоохторо Владислав Николаевич уонна уола Тимофей Максимовтар. Владислав Николаевич НЦРБ суоппара уола Тимофей И.Е. Винокуров аатынан Хатыҥ Арыы орто оскуолатын 3 «б» кылааһын үөрэнээччитэ буолар. Максимовтар элбэх оҕолоох дьиэ кэргэттэрэ, Тимофей күрэх саамай кыра кыттааччыта буолла. Күрэх кыттыылаахтарын уонна көрөөччүлэри Хатыҥ Арыы нэһилиэк баһылыга Иван Ноговицын, дьаһалта сүрүннүүр специалиһа Надежда Сивцева, Граф Биэрэгин Аҕа сүбэтин председателэ Мичил Герасимов эҕэрдэ тылларын тиэртилэр, күрэхтэһээччилэргэ ситиһиилэри баҕардылар. Бүгүҥҥү күрэх спонсордарынан буоллулар: Хатыҥ Арыы нэһилиэк олохтоох дьаһалтата, баһылык Иван Ноговицын, Хатыҥ Арыы нэһилиэк депутаттарын сэбиэтэ, председатель Евгений Жирков, МАУ «Спектр» директор, Сергей Парников, Хатыҥ Арыы нэһилиэк ыччат уонна спорт отдела директор, Егор Бурнашев, Хатыҥ Арыы нэһилиэк аҕа сүбэтэ, Никита Килбясов, нэһилиэк депутата Дмитрий Кривошапкин, «Озернай» маҕаһыын, салайааччы Михаил Новиков, «Нам-Авто» маҕаһыын, салайааччы Евгений Эверстов.
Аҕа уонна уол күрэҕэ уопсайа алта түһүмэҕинэн барда.
Бастакы түһүмэх бэрэбинэ суоруу, иккис түһүмэх суоруллубут маһы эрбээһин, үһүс түһүмэх чуурканы хайытыы, төрдүс түһүмэх остуолбаҕа тахсыы, бэһис түһүмэх ойбон алларыы, алтыс түһүмэх хайыһардаах эстафета.
Хас түһүмэх аайы судьуйалар ананан Мичил Герасимов уонна Никита Килбясов салайыытынан үлэлээтилэр. Ол курдук, Гаврил Макаров, Дмитрий Ноговицын, Моника Евстафьева дьүүллүүр сүбэҕэ, уопсай тэрээһиҥҥэ Надежда Сивцева, Михаил Сивцев, Петр Сивцев үлэлээтилэр.
Күммүт чаҕылыччы тыган, сааспыт сылаас тыынынан угуттаан кыттааччыларга, түөлбэттэн ыалдьа кэлбит көрөөччүлэргэ бэрт күнү бэлэхтээтэ.
Хас түһүмэх ахсын тутатына муҥутуур кыайылаахха грамота уонна харчынан сертификат туттарылынна. Ол курдук, мас суоруутугар уонна маһы хайытыыга Петр, Денис Дьячковскайдар, маһы эрбээһиҥҥэ Владислав, Тимофей Максимовтар, ойбон алларыытыгар, остуолбаҕа тахсыыга уонна хайыһар эстафетатыгар Аркадий, Оскар Соловьевтар бастааннар мэтээлинэн, харчыннан сертификатынан наҕараадаланнылар.
Тыҥааһыннаах киирсии түмүгүнэн бэлэмнээх, тулуурдаах Аркадий уонна Оскар Соловьевтар кыайыы көтөллөнөн кубогынан мэтээлинэн «Дельфин» маҕаһыынтан сыаналаах сертификатынан наҕараадаланнылар.
Иккис бочуоттаах миэстэни эмиэ сыллата Аҕа күрэҕэр кыттар, общественник, спортсмен Петр Дьячковскай уола Денис ылан, грамотанан, мэтээлинэн уонна «Озернай» маҕаһыыҥҥа сертификатынан наҕараадаланна.
Онтон күрэх саҕаланыаҕыттан кыттааччылар уонна көрөөччүлэр сүрүн болҕомтолорун ылбыт, кырачаан кыттааччы Тимофей «Саамай кыра кыттааччы» анал ааты уонна «Дельфин» маҕаһыыҥҥа сертификатынан наҕараадаланна.
Максимовтар дьиэ кэргэттэрэ үһүс бочуоттаах миэстэни ылан, «Нам-Авто» маҕаһыыҥҥа сертификат, грамота, мэтээл туттулар. Тимофей улахан уолаттары кытта тэҥҥэ кыттан, эр киһи санаабытын оҥорор, толкуйдаабытын толорорун дакаастаата.
Түөлбэлэрин чиэһин көмүскээбит кыттааччыларга түөлбэ аатыттан салайааччылар кэлэн сэмэй бэлэхтэрин туттардылар.
Улууска ыытыллар «Аҕа уонна уол» күрэҕэр Хатыҥ Арыы нэһилиэгиттэн Аркадий Дмитриевич уола Оскардыын иккис төгүлүн кыттар чиэскэ тигистилэр. Бары күрэх кыттыылаахтарыгар, тэрийээччилэригэр, спонсардарыгар үрдүктэн үрдүк ситиһиилэри, чэгиэн туругу, эйэлээх олоҕу баҕарабыт.
Надежда Сивцева