Ленскэй нэһилиэк олохтоох дьаһалтата волейболга Петр Оконешников аатыгар аһаҕас турнир тэрийиэҕэ. Эдэр уолаттарга волейбол U-21 турнирыгар ахсынньы 21-22 күннэригэр култуурнай-спорт комплексыгар бастыҥ хамаанда ааттаныаҕа.
Ол курдук, Нам улууһугар Чурапчы, Таатта, Мэҥэ Хаҥалас, “Легион” волейбол кулууба, Уус Майа, АГАТУ ыҥырыылаах хамаандалара волейбол оонньуутугар киириэхтэрэ. Ону тэҥэ, хаһаайыттар Нам уонна Ньургун Тимофеев аатынан өрөспүүбүлүкэтээҕи Олимпийскай эрэл спорт оскуолатын хамаандалара күрэхтэһиэхтэрэ. 2025 сыл үүнүөн иннинэ, улуус дьоно-сэргэтэ, волейбол сүгүрүйээччилэрэ таһымнаах, ыһыылаах-хаһыылаах оонньууну көрөрү күүтэллэрэ саарбаҕа суох.
Оконешников Петр Петрович РФ норуотун үөрэҕириитин туйгуна, СӨ физическай култуураҕа уонна спорка үтүөлээх үлэһитэ буоларынан биллэр.
Оконешников Петр Петрович — 1944 сыллаахха Мэҥэ Хаҥалас улууһун Майа сэлиэнньэтигэр күн сирин көрбүтэ. 1962 сыллаахха Чурапчы орто оскуолатын бүтэрэн 1963-66 сс. Алтайскай кыраайга Бийскай к. ытык иэһин толорбут, сулууспалаабыт. 1971 с. Омскайдааҕы физкультурнай институту бүтэрэн Дьокуускай 3-с нүөмэрдээх оскуолаҕа үлэтин саҕалаабыт. Онтон 1973-1980 сс. Чурапчыга физкультура учууталынан үлэлээбит. 1980-90 сс. Нам орто оскуолатыгар физругунан, 1990-99 сс. Граф Биэрэгэр Затоннааҕы орто оскуолаҕа дириэктэрдиир. 1998 с. Намнааҕы Оҕо спорт оскуолатыгар үлэлээбит.