Саха сиригэр атырдьах ыйын 17 күнүттэн көтөр кынаттаахха күһүҥҥү булт кэмэ саҕаланна. Бултааһын кэмигэр эчэйии тахсыбатын туһугар, чуолаан оҕо доруобуйатын, олоҕун харыстыыр сыалтан, улахан киһи сэрэхтээх буолара ирдэнэр.
СӨ Бырабыытылыстыбатын бэрэссэдээтэлин солбуйааччыта Ольга Балабкина иһитиннэрэринэн, 2024 сыл саҕаланыаҕыттан өрөспүүбүлүкэ үрдүнэн, кус кэмигэр сааттан 6 оҕо эчэйбит. Ол иһигэр Амма улууһугар бэс ыйын 2 күнүгэр оҕо өлүүлээх түбэлтэ тахсыбыт.
Сокуон, хааччах кытаатара, күүһүгэр киирэрэ киһиттэн тутулуктаах. Саа, автомат, бинтиэпкэ, бэстилиэт анал сейфка хараллыахтаах. Сейф күлүүһэ оҕо тиийбэт сиригэр ууруллуохтаах. Ол үрдүнэн, оҕо көҥүлэ суох сааны кистээн ылан ытан холонон көрөрүттэн эбэтэр төрөппүт көҥүл туттарарыттан үчүгэйэ суох түмүк тахсара бэлиэтэнэр. Ленскэй нэһилиэк олохтоох дьаһалтата иһитиннэрэринэн, оҕо олоҕор уонна доруобуйатыгар, маны тэҥэ, буруйу оҥоруутугар төрөппүт уонна опекун толору эппиэтинэһи сүгэр.
