Хамаҕаттатааҕы Саха-француз лицей үөрэнээччилэрэ сааскы сынньалаҥы туһалаахтык атаарбыттарын дириэктэри иитэр үлэҕэ солбуйааччы Светлана Новгородова билиһиннэрэр.
Казань куоракка 8 оҕо Люция Дмитриевна Ушницкая, Андрей Петрович Слепцов салайааччылаах баран, научнай-чинчийэр Бүтүн Арассыыйатааҕы кэмпириэнсийэҕэ кыттан кэллилэр. 5 оҕо: Федоров Валентин, Широких Айгылаана, Васильев Денис, Протопопова Женя, Ушницкай Вася ситиһиилээхтик кыттан, дипломант үрдүк аатын сүктүлэр.
Улуустааҕы уус-уран ааҕыы чемпионатыгар Аладов Данил уонна Сивцева Лиза кыттаннар, Лиза 2-с миэстэ буолары ситистэ.
Маҥнайгы кылаас үөрэнээччилэрэ Сунтарова Анжелика, Новгородов Сандал «Олоҥхо дойдутун оҕотобун» өрөспүүбүлүкэтээҕи фестивальга кыттан «Кэскиллээх бөлөх» анал ааты ыллылар. Уһуйаантан саҕалаан эрчиллибит дьарыктарынан ситиһиилэнэн, быйыл сайын Амма улууһугар ыытыллар Олоҥхо ыһыаҕар кыттар чиэстэннилэр.
8-с кылаас оҕолоро Партизан бөһүөлэгэр ыытыллыбыт улуустааҕы хомус күрэҕэр кыттан бастакы истиэпэннээх лауреат үрдүк аатын сүктүлэр. Бу кылаас үөрэнээччилэрэ аҕыйах хонугунан Санкт-Петербурга ыытыллар «Поедем по России» бырайыакка кыттан, Сахабыт сирин, лицейбит аатын көмүскүөхтэрэ.
7-с «б» кылаас талааннаах оҕолоро «Саас» Аан дойдутааҕы фестиваль-куонкуруска кыттан дипломант 1-кы истиэпэнин уонна өрөспүүбүлүкэтээҕи «Ырыа түмэн» күрэх Гран-При кыайыылаахтарынан буоллулар.
«Сардаҥалаах аартык» ырыа, үҥкүү күрэҕэр 6-с кылаас үөрэнээччитэ Рязанская Амелия 2-с истиэпэннээх лауреат буолла.
Спорка эмиэ үгүс ситиһиилэр кэллилэр. Өрөспүүбүлүкэтээҕи дзюдо күрэҕэр Васильева Кристина 3-с бочуоттаах миэстэни ылла. Кыһыҥҥы спартакиадаҕа кыттан, Чульмаҥҥа фигурнай хаҥкы күрэҕэр уолаттарга Харатаала Арчылаан 4-с миэстэ, өрөспүүбүлүкэтээҕи кикбоксинг күрэҕэр Новгородов Дьулусхан 1 миэстэ ылары ситистилэр.
Ити курдук, үгүс оҕолорго сынньалаҥ күннэрэ ситиһиилээх буоллулар.
Мария Винокурова