Россия Президенэ Владимир Путин атырдьах ыйын 23 күнүгэр Курскай кыргыһыыга кыайыы 80 сылыгар байыаннай дьайыы кыттылаахтарыгар государственнай наҕараадалары туттарарыгар биир дойдулаахтарбыт баалларыттан киэн тутуннубут.
Ол курдук, Россия Геройа буолар чиэскэ Запорожскай хайысхаҕа ВСУ бронетехникатын үлтүрүппүт «Алеша» тааҥка экипаһа тигистэ. Экипаж састаабыгар Саха сириттэн Алексей Неустроев уонна Филипп Евсеев бааллар. «Дьиҥэр, биһиги тааҥкабыт «Дед» диэн ааттанара. Хайаан да кистэлэҥ ыҥырыы артиллериянан ананар. Кинилэр экран нөҥүө эрэ көрөллөр, онон хас биирдии тааҥкаҕа аат иҥэриллэр. Онтон биһиги наводчикпыт Алексей Неустроев аатынан «Алеша» диэн ааттанна. Биһиги дьыалабытыгар саамай кылаабынай киһинэн наводчик буолар…», — диэн Алексей бойобуой доҕоро «Саха» НКИХ суруналыыһа Николай Бястиновтыын интервьютугар кэпсээбитэ.
Алексей Винокуров, «Нам улууһа» МТ депутаттарын Сэбиэтин председателэ:
«Бүгүн сарсыарда, биһиги, Саха сирин норуота, дьоно-сэргэтэ дойдубут Президениттэн Владимир Путинтан саха чулуу уолаттара наводчик-оператор Алексей Неустроев, механик-суоппар Филипп Евсеев улахан наҕараада туппуттарыттан бары биир санаанан, биир тыынынан үөрдүбүт, астынныбыт.
Эрдэ тарҕаммыт геройдуу киирсии видеотын көрөн баран, хорсун быһыыттан киэн туттубуппут. Онтон ити киирсиигэ биһиги уолаттарбыт, биир дойдулаахтарбыт баалларыттан икки бүк үөрбүппүт уонна долгуйбуппут. Маннык киирсиигэ буойуттар харса суохтарын, муударай өйдөрүн, хорсун санааларын көрдөрөннөр РФ Геройун аатын сүгэри ситистилэр. Иккиэн оҕо эрдэхтэриттэн тыа сиригэр улаатан, олорон үлэҕэ, булка сыстаҕас буоланнар уолуйбатах, сөптөөх суолу тобулбут буолуохтаахтар.
Алексей Неустроев армияҕа сулууспалаабыт кэмигэр үчүгэй үөрүйэҕи ылбыт диэн сыаналыыбын. Ити үлүгэр буруо-тараа быыһынан харса-хабара суох хас биирдии ытыыта өстөөх техникатын сууһаран утары киириини тохтотто. Онтон Филипп Евсеев түргэн-тарҕан туттуута, тааҥканы түргэнних хамсаппыта киһини сөхтөрөр.
Байыаннай дьайыыга сылдьар саха буойуттара хайаан да дойдуларыгар кыайыы көтөллөөх, доруобай кэлэллэригэр баҕарабын.
Семен Аргунов