Нам улууһугар гиирэ спордугар Саха сирин Федерациятын Кубога буолан бүттэ. Федерация Кубогар икки күн устата 15 улуустан 100-тэн тахса бастыҥ гиревик күрэхтэстэ.
2024 сылы түмүктүүр чемпионакка күрэхтэспит гиревиктар ортолоругар Россия, норуоттар икки ардыларынааҕы спорт маастардара, Россия, Европа, аан дойду кыайыылаахтара, ааттаах-суоллаах спортсменнар бааллара.
Хамаанда бастакы үктэлгэ тахсан турарыгар 7 эр дьон, 3 ветеран эр дьон, 3 дьахтар, 2 ветеран дьахтар күүстэрин барытын ууран 24 кг, 32 кг ыйааһыннаах гиирэлэри өрө аспыттара уонна өрө көтөхпүттэрэ.
“Гиирэ спордугар Саха сирин Федерациятын Кубога Нам улууһугар хаһыс да сылын ыытыллар. Гиирэ спордугар күүстээҕинэн Үөһээ Бүлүү хамаандата буолла. Иккис үрдэлгэ Хаҥалас улууһа таҕыста. Үһүс миэстэҕэ Нам улууһа таҕыста”, – диир улуустааҕы спорт управлениетын салайааччыта Павел Иванов.
Дьахталларга Изабелла Массаева 58 кг 2 миэстэ, Юлия Семенова 68 кг кыайыылаах үрдүк аатын ылбыт. Оттон эр дьоҥҥо 63 киилэҕэ Иннокентий Окоемов бу да сырыыга тэҥнээҕин булбатах. Салгыы, ветеран эр дьоҥҥо Герасим Стрекаловскай 78 киилэҕэ 3-с бочуоттаах миэстэҕэ тахсан турбут. Нам улууһугар гиирэ спордун өрө көтөхпүт Павел Иванов бэйэтэ 85 киилэҕэ кыайыылаах буоларын дьыаланан дакаастыыр. Бу диэн эттэххэ, улуустааҕы “Олимпик” спорт оскуолатын дириэктэрэ Изабелла Массаева, спорт салайааччыта Павел Иванов кыайыыга дьулуурдарынан үгүс эргитиитэ суох “Тиһэххэ диэри” диэн күүстээх тыллары тута өйдүүгүн. Киһи спортаах улуус диэҕи баҕарыллар.
Гиирэ спордугар Нам улууһун чиэһин көмүскээччилэр дьарыктарын туруга орто бигэ сыананан кэмнэннэ. Бэлиэтээн эттэххэ, дьахталларга да, эр дьоҥҥо да былырыыҥҥыттан ылсан, гиирэ спордугар хаттаан төннөн саҕалаабыттар бааллар. Онон, өрөспүүбүлүкэ бастыҥнарын кытта илин-кэлин түсүһэр манан дьыала буолбатах. Биллэн турар, ааттаммыттарга долгуйуу, өйгө-санааҕа эппиэтинэһи күүскэ ылыныы улаханы оонньуур.
Гиревиктэр тимиргэ хатарыллыылара, чочуллан тахсыылара өссө салҕаныаҕа. Ол курдук, спортсменнар кэлэр сыл олунньутугар сбор ааһаллара былааҥҥа турар.
Герасим Стрекаловскай 24 киилэ ыйааһыннаах гиирэлэри өрө анньар
Харысхан Попов