Нам улууһун хоту нэһилиэктэрэ чөллөрүгэр түһэллэригэр субуотунньуктар күннэтэ ыытыллаллар. Нам улууһун иэдээнигэр Саха сирэ бүттүүн көмөтүн биллэрдэ, илиитин утары уунна. Бүгүн Саха сирин уопсастыбаннай палаататын чилиэннэрэ, 5 састаап Хатырыкка үлэлээтилэр.
Ол курдук, уопсастыбанньыктар Жанны Грекова, Вера Устинова, Юрий Семенов, Владислав Окороков, Алексей Индеев, СӨ уопсастыбаннай палаататын специалиһа Вадим Дьяконов салалталаах Хатырыкка көмө оҥордулар. Ону тэҥэ, уопсастыбанньыктары кытта Саха сирин «СВО буойуннарын чиэстээһин» дьиэ кэргэттэр Сойууһун чилиэттэрэ Вероника Семенова уонна Евгения Бубякина сырыттылар.
СӨ уопсастыбаннай палаататын чилиэттэрэ ыксаллаах-быһыыга майгыга түбэспиттэргэ көмөлөһөн турардаахтах. 2021 сыллаахха Горнай улууһун алдьархайыгар уокка былдьаммыт Бэс Күөлүгэр күүһүн уурбуттара. Ону тэҥэ, COVID саҕана ветераннарга гуманитарнай көмө оҥорбуттара.
“Хатырыктар махтаналлар уонна биһигини көрөн “күүппэтэхпит” диэн соһуйаллар. Хатырыкка 10-ча буолан кэлэн көмөлөстүбүт. Кичэллээхтик чөкөтүллүбүт, биир сиргэ хомуллубут бөҕү-сыыһы таска таһаардыбыт. Ол курдук, биһиэхэ бүгүн баһылык э.т. Артур Ноговицын икки бырысыаптаах тыраахтар биэрэн, барыта 10 толору бырысыап бөҕү тиийиэхтээх сиригэр илтибит. Ону тэҥэ биирдиилээн ыалларга эмиэ көмөлөстүбүт.
Хатырыкка субуотунньуктааччы элбэх. Бүгүн СӨ экология, айылҕа харыстабылын министрэ Евгений Перфильев үлэлээтэ, ЫБМ үлэһиттэрэ уо.д.а. бааллара. Саха сирин олохтоохторо бу курдук бары бииргэ тутуһан сырыттахпытына, үтүөнү көрүү, сайдыы барыаҕа”, – диэн санааларын үллэстэллэр СӨ уопсастыбаннай палаататын чилиэттэрэ.
Харысхан Попов