1966 с. Нам орто оскуолатын 10 “а” кылааһын оҕолоро, эдэркээн кыргыттар уонна уолаттар күргүөмүнэн, «Оскуола-производство-үрдүк үөрэх» диэн девиһинэн аан маҥнайгынан республикаҕа ыҥырыы таһааран, Үөдэйгэ үлэлии тахсыбыттара. Тыа сирэ ити кэмнэргэ ыччат романтиката буолбута.
Үлэ бэтэрээнэ, «Бочуот знага», «Үлэ Кыһыл Знамята» уордьаннар кавалердара, СӨ тыатын хаһаайыстыбатын Государственнай бириэмийэтин Лауреата, РСФСР тыа хаһаайыстыбатын социалистическай куоталаһыытын кыайыылааҕа, чемпион ыанньыксыт Николай Шестаков «Сталин» холкуоска субай сүөһү көрүүтүнэн, «Дьыҕыныатта», «Лена», «Эрчим» ыччат комсомольскай, «Кэскил» бороон көрөөччүлэр фермаларыгар старшайынан, наставнигынан өр сылларга үлэлээбитэ.
Былырыын Николай Романович төрөөбүтэ 85 сылыгар уонна кини олорон ааспыт олоҕор, үрүҥ аһы дэлэтэр ситиһиилээх үлэтигэр аналлаах «Николай Романович Шестаков – ыччат хамсааһынын көҕүлээччи» диэн ахтыы киэһэтэ буолан ааспыта. Онно ситэрэн, бэҕэһээ, кулун тутар 29 күнүгэр З.П. Саввин аатынан Үөдэй орто оскуолатын «Ийэ Албан аата» музейыгар «Саха сирин үлэһит дьоно» кинигэ сериятыгар Николай Романович Шестаков кинигэтэ сүрэхтэннэ. Кинигэни А.Д. Яковлев, В. Н. Викторова хомуйан оҥордулар.
Бу күн Николай Романович олорон ааспыт олоҕун, күргүөмнээх үлэтин, үлэҕэ-хамнаска көҕүлүүр истиҥ-иһирэх сыһыанын, мааны майгытын туһунан биир дойдулаахтара, бииргэ үлэлээбит дьоно ыраахтан-чугастан мустан, ахтан-санаан аастылар.
Сиһилии — видеоҕа:
Лена Корякина