Саха-француз лицейигэр үөрэх сылын түмүктүүр, самаан сайыны көрсөр оскуола уйгулаах ыһыаҕа күөх сирэмҥэ буолла.
Онтон биир кэрэхсэбиллээх түгэни бэлиэтиир тоҕоостоох. Арассыыйаҕа Дьиэ кэргэн сылынан оскуола олоҕор, иитэр-үөрэтэр үлэтигэр көхтөөх кыттыыларын иһин Марк, Октябрина Барашковтар дьиэ кэргэттэрэ өр сылларга социальнай педагогунан үлэлээбит, педагогическай үлэ ветерана Екатерина Гаврильевна Саввинова бэйэтин дьиэ кэргэнин аатыттан олохтообут анал стипендиятын ыһыаҕы тэрийээччи Люция Ушницкая илиититтэн туттулар.
Санатан эттэххэ, маннык стипендияны аан бастаан 2001 сыллаахха элбэх оҕолоох Роберт Иннокентьевич, Нина Семеновна Харитоновтар ылбыттара. Ол күнтэн Екатерина Саввинова күн бүгүнүгэр диэри сайдам ыалы үксэтээри, сайдыылаах ыччаты иитээри, ийэ-аҕа оруолун үрдүктүк тутар элбэх дьиэ кэргэни сүрэҕин сылааһын биэрэн, өйөөн кэллэ. Екатерина Гаврильевна бэйэтэ Уус Алдан Балаҕаннаах учаастагыттан Барашковтарга эҕэрдэтин ыытар.
Мария Винокурова