«Түөлбэ» оҕо Киинин аттыгар «Кэнчээри» оҕо уһуйаанын сирэ туттуллубакка турбутун биһиги арендаҕа ылан 5 сыл хортуоппуй олордо сылдьыбыппыт. Онтон сирдээх тэрилтэ бобсон тохтуу сылдьыбыппыт, ол кэннэ былырыыҥҥаттан бастаан быстах кэмҥэ туһанарга ылан, хортуоппуй, кыра оҕуруот аһын уонна сибэккилэри олордубуппут. Бу үөрэх сылыгар улууспут Аҕа Баһылыга Юрий Иннокентьевич Слепцов биһиги туруорсуубутун өйөөн, дьаһал таһааран, туох баар докумуоннарын эккирэтиһэммит, быстах кэмҥэ ылбыт сирбитин «Түөлбэ» оҕо Киинин бас билэр сирэ буоларын ситистибит.
2024 сыл муус устар ый саҕаланыытыгар оҕолор икки ардыларыгар саҥа сир ландшафтнай дизайныгар күрэх тэрийэн ыыппыппыт. Ол түмүгүнэн бастакы миэстэни «Юнэк» куруһуога (салайааччы Жиркова С.А.) кыайан 5 000,00 солк. наҕараадаламмыта. Кыайбыт үлэҕэ олоҕуран саҥа сирбитигэр тутуу үлэтэ саҕаланна. Бу миэстэҕэ «Эдэр фермер» бизнес-бырайыак үлэлиэҕэ, учаастакка араас оҕуруот астарын олордон чинчийэн үөрэтиэхтэрэ, онно олоҕуран оҕолор саҥа тэриллибит научнай обществолара араас дакылааттары суруйаллара былааннанар, оҕолор сынньанар, концертыыр сирдэрэ эмиэ баар буолуохтаах. «Түөлбэ» оҕо кииниттэн үөрэнэн-иитиллэн тахсыбыт выпусниктарбытыгар анаммыт Аллеяҕа араас сибэккилээх мастары олордуохтаахпыт.
Саха өрөспүүбүлүкэтигэр Оҕо Саас сылынан оҕолор тэрилтэлэригэр дьоһун бэлэҕи онорбутугар оҕолор, үлэһиттэр, төрөппүттэр уонна выпусниктар ааттарыттан Аҕа Баһылыкпытыгар Юрий Иннокентьевич Слепцовка дириҥ махталбытын тиэрдэбит!
Юрий Иннокентьевичка үлэҕэр үрдүк ситиһиилэри, тус бэйэҕэр доруобуйаны, уһун дьоллоох олоҕу, табыллыыны баҕарабыт, барыта санааҥ хоту буоллун! Уонна оҕолорбут баҕа санаалара туолан — саҥа оҕо Дыбарыаһа Нам сэлиэнньэтин хабыллар хаба ортотугар, эргэ кулууппут оннугар, тутуллан барыбытын үөрдүө диэн эрэнэбит!
Н.Г. Дьячковская, дириэктэр.