Партизан нэһилиэгэр саҥа үүммүт 2025 сылбыт өрөбүл күннэригэр араас сэргэх тэрээһиннэр буолан аастылар.
Уон үс оҕолоох ыал сыдьааннара Марина уонна Петр Неустроевтар быйыл иккис сылын «Тиэргэн – 2025» олбуор киэргэтии күрэҕэр спонсордаатылар. Быйыл сиэннэр тахсан эбэлэрэ, эһэлэрэ урут тыыннаах харыйа туруоран, барыларын ыҥыран тэрээһин оҥороллорун ахтан-санаан, ыаллыы олорор дьоннорун оҕолорун ыҥыран бэлэх ууннулар. Биһиги эмиэ дьоммутугар үөрүүнү бэлэхтээрибит диэн элбэх оҕолоох ыалларга, эдэр дьоҥҥо ыҥырыы курдук буолла. Куонкуруска уопсайа 8 дьиэ кэргэн кытынна. Көрүү түмүгүнэн 1-кы миэстэ Наталья Константинова дьиэ кэргэнэ, 2-с миэстэ Юлия, Дмитрий Рыкуновтар, 3-с миэстэ Ульяна, Джек Челбердировтар буоллулар.
Түөлбэлэр икки ардыларыгар «Үҥкүүлээ» диэн олус үчүгэй куонкурус буолан ааста. Биэс түөлбэлэрбит бары бииртэн биир араас үҥкүүлэри көрдөрдүлэр. Хаһан да сыанаҕа тахсыбатах ыаллар тахсан дьон биһирэбилин ыллылар. Түмүк таһаарыыга дьүүллүүр сүбэҕэ ыарахаттардаах буолбута саарбаҕа суох. Үс түһүмэх түмүгүнэн 1-кы миэстэҕэ«Эрэл» түөлбэ (сал. Евдокия Оконешникова), 2-с миэстэҕэ «Парковай» түөлбэ (сал. Джулияна Саввинова), 3-с миэстэҕэ «Муоҕан» түөлбэ (сал. Татьяна Афанасьева) таҕыстылар.
«Үтүө санаа харыйата» акцияҕа тэрилтэлэрбит, общественность кыттыһан уопсайа 62 оҕо минньигэс бэлэх тутта. Оҕолорго үтүөнү, үөрүүнү бэлэхтээбит дьоммутугар махталбытын тиэрдэбит.
Полина Скрябина, Партизан