В.П. Артамонов аатынан Хамаҕатта саха-француз лиссиэйин Саҥа дьыллааҕы киэһэтигэр төрөппүт сэбиэтин көҕүлээһининэн (сал. Розалия Новгородова), Дьиэ кэргэн сылынан, «Симэммит хаатыҥка — 2024» сонун куонкурус ыытылынна. Дьиэ кэргэттэр хаатыҥканы аппликация, макраме техникатынан, оҕуруонан уонна араас киэргэллэринэн симээбиттэрэ олус кэрэтик көһүннэ.
Ивановтар дьиэ кэргэн (7 «б» кыл.) хос эһэлэрэ 100 сыл анараа өттүгэр кэппит хаатыҥкатын реликвия оҥостон илдьэ сылдьаллар эбит, ийэлэрэ оҕо сылдьан кэппит хаатыҥкатын эмиэ харыстаан уура сылдьалларын билиһиннэрдилэр. Дьиэ кэргэттэр хаатыҥкаларын историятын, хайдах киэргэппиттэрин билиһиннэрдилэр.
Алын сүһүөх кылаастарга Саввиновтар (4 кыл.) — 1 миэстэ, Петровтар (2 кыл.) — 2 миэстэ, орто сүһүөххэ Ивановтар (7 «б») — 1 миэстэ, Ивановтар (8 «а») — 2 миэстэ, Сивцевтэр (7 «а») — 3 миэстэ буоллулар. Дьиэ кэргэттэр Добун сурук, бэлэх туттулар.
Ити курдук, төрөппүт сэбиэтин саҥа састааба сонун күрэх ыытан Саҥа дьыллааҕы бырааһынньыгы киэргэттилэр, дьиктини бэлэхтээтилэр, — диэн үөрүүтүн үллэстэр лиссиэй социальнай педагога Люция Ушницкая.
Мария Винокурова