Ахсынньы 26 күнүгэр Нам улууһун Маймаҕатыгар «Олорор дьиэ уонна куорат эйгэтэ» национальнай проегынан Сахабыт сиригэр «Хаарбах туруктаах дьиэттэн дьону көһөрүү» программанан 4 квартиралаах дьиэни үөрүүлээхтик астылар.
Ааспыт үйэҕэ тутуллубут 4 квартиралаах хаарбах туруктаах, саахалланар кутталлаах дьиэттэн хаһаайыттар көһөннөр, кэлэр 2025 сылы таас, ичигэс, толору хааччыллыылаах, тупсаҕай тутуулаах саҥа дьиэлэригэр көрсөр үөрүүлэрэ тосхойдо.
Эргэ дьиэ олохтоохторо улахан кыһалҕаны көрсөн кэллилэр. Эргэрэн, кээһэнэн акылаата, муостата айгыраан, үрдүтэ саккыраан улахан көрүү-харайыы көмөтүнэн олорбуттара. Сылын аайы үрдүкү былаас уонна улуус дьаһалтатын отчуоттарыгар саҥа дьиэни туруорсаллара. 1998 сыллаахха ууга бара сылдьыбыт, эбиитин быйыл саас халаан уута дьиэ өһүөтүгэр тиийэ таһымынан ылан, олорор да усулуобуйалара суох буолбуттара.
Нэһилиэк дьаһалтата күүскэ туруорсан, үлэлэһэн «Олорор дьиэ уонна куорат эйгэтэ» национальнай проект чэрчитинэн «Хаарбах туруктаах дьиэттэн дьону көһөрүү» программаҕа киирэн, Лебедев аатынан уулуссаҕа «ГМ Групп» ХЭТ (ген. директор Михаил Гуляев) саҥа дьиэни тутан үлэҕэ киллэрдилэр.
Тыа сирин олохтоохторо тупсаҕай тас көстүүлээх, толору хааччыллыылаах, сырдык, сылаас дьиэ күлүүһүн тутан үөрүүлэрэ үксээтэ. Дьэ мантан иннэ, бары усулуобуйа барыта баар дьиэтигэр нус-хас олох түстэниэ, оҕо, сиэн үөрүүтэ үксүө турдаҕа.
Бэйэ информ.
Хаартыскалар: «Нам улууһа» МТ пресс-сулууспата,
«Кыым» норуот хаһыатын саайта