Нам улууһун “Солнышко” уһуйаан иитиллээччитэ Самсонов Артур Соҕуруу Корея Тэджон куоратыгар норуоттар икки ардыларынааҕы «IYRC-2024» робототехника күрэхтэһиититтэн үрдүк үөрүүнү, киэн туттууну аҕалла.
Робототехникаҕа норуоттар икки ардыларынааҕы IYRA ассоциация, университеттар үлэһиттэрэ тэрийбит быйылгы күрэхтэһиитигэр, атырдьах ыйын 2-3 күннэригэр, Тэджон куоракка 20 дойдуттан 1000 кэриҥэ оҕо кыттыыны ылбыт.
Соҕуруу Кореяҕа таһымнаах күрэхтэһиигэ Россия чиэһин Саха сирин 7 кыттааччыллаах хамаандата көмүскээбит. Саха сирин оҕолорун Оҕо киинин робототехникаҕа салайааччыта Петрова Октябрина Семеновна түмэн, салайан илдьэ сылдьыбыт. Ол курдук, оскуола иннинээҕи саастаах Саха сирин оҕолоро тус бэйэ туһугар уонна айар түһүмэхтэргэ бириистээх миэстэлэри ылбыттара этиллэр.
Сыыппара эйгэтэ, оруобаттары оҥоруу муҥутуурдук сайдыбыт дойдуга ыытыллыбыт норуоттар икки ардыларынааҕы «IYRC-2024» робототехника күрэхтэһииттэн оҕолорбут олус үрдүк үөрүүнү аҕаллылар. “Сафари” тус бэйэ туһугар түһүмэххэ, 5-8 саастаах кыттааччы бөлөҕөр Grand муҥутуур кыайыылааҕынан Нам улууһун “Солнышко” уһуйаан иитиллээччитэ Самсонов Артур ааттаммыт. Бу кыайыынан тохтообокко, Артур “Боулинг” күрэхтэһии түһүмэҕэр икки кыһыл көмүс мэтээллэри кэппит. Оттон кини кэнниттэн биир дойдулаахпыт, Ньурба куораттан Филиппова Вика үрүҥ көмүс мэтээли ылары ситиспит. Салгыы үһүскэ Бэрдьигэстээхтэн Данилова Николь тахсыбыт. Бу курдук үс бириистээх миэстэни саха оҕолоро түмүктүүллэр.
Сүүмэрдэммит хамаанда салайааччыта Октябрина Петрова Нам улууһун “Солнышко” уһуйаан коллективыгар махтанарын биллэрэр. Самсонов Артур улахан таһымнаах күрэхтэһииттэн үс мэтээли ылыан ылан уһуйаанын историяҕа киллэрбитин иһитиннэрбит. Робототехникаҕа үөрэтэр Татьяна Аркадьевна олус күүстээх педагог, өрөспүүбүлүкэҕэ тарбахха баттанар үөрэтээччи буоларын бэлиэтээбит. Саргылана Федорова салайааччылаах “Солнышко” уһуйаан баазатыгар үгүс семинардар, турнирдар буолалларын Октябрина Семеновна бигэргэтэр.
Харысхан Попов