Нам сэлиэнньэтин сиригэр-уотугар бу күннэргэ үгэскэ кубулуйбут профилактическай тэрээһиннэр ыытыллаллар. Ол курдук, хас уһун сынньалаҥ ахсын “Внимание! Каникулы!” рейдэ үлэтэ оскуола педагогтара, төрөппүттэр кыттыылаах барар.
“Внимание! Каникулы!” операция сокуоннай сааһын туола илик оҕо доруобуйатын харыстыыр уонна буруйу оҥорорун сэрэтэр сүрүн сыаллаах ыытыллар. Нам оскуолаларын төрөппүттэрэ бу тэрээһиҥҥэ, буоларын курдук, олус көхтөөхтүк кытталлар. Хас биирдии төрөппүт оҕотугар сөптөөх болҕомто уурара, сөбүгэр хонтуруоллуура, оҕо бириэмэҕэ олохтоммут бэрээдэги тутуһара, бу олус улахан суолталааҕын өйдүөх тустаахпыт.
Санаттахха, уопсастыбаннай сирдэргэ – уулуссаларга, подъезтарга, маҕаһыыннарга, сквердэргэ, пааркаларга, тэрилтэ дьиэлэригэр уонна да атын сирдэргэ сокуоннай сааһын туола илик оҕо 22.00 чаастан сарсыарда 6.00 чааска диэри сылдьара сокуонунан кытаанахтык бобуллар! Оттон сайыҥҥы кэмҥэ оскуола оҕото 23.00 чаастан сарсыарда 6.00 чааска диэри ааттаммыт уопсастыбаннай сирдэргэ сылдьыа суохтаах.
Маны хас биирдии оҕо тутуһуохтааҕын, оҕо доруобуйатын тас дьайар эйгэттэн харыстаары уонна буруйу оҥорорун туоратар сыаллаах буоларын төрөппүт сөпкө өйдүөхтээх!
Ленскэй нэһилиэк пресс-киинэ