Нам улууһугар халаан уутугар барбыт нэһилиэктэри чөллөрүгэр түһэрии үлэтэ күүстээхтик саҕаланна.
Сааскы халаан уута имири сотон ааспыт нэһилиэктэрэ “сэрии буолан ааспытын курдук буолар” дииллэрэ оруннаах. Бэйэ баҕаларынан кэлээччилэр, тэрилтэ үлэһиттэрэ, түмсүүлэр бу күннэргэ кытаанах үлэҕэ туруннулар. Спорду кытта доҕордоһор үлэһиттэр Маймаҕа, Хатырык, Модут, Граф Биэрэгин нэһилиэктэригэр көмөлөһө айанныыллар.
“Бу күннэргэ спорт култууратын тэрилтэлэрэ тэринэн, турунан хоту нэһилиэктэргэ көмөбүтүн биир киһи курдук холбуубут”, – диир улуустааҕы спорт управлениетын салайааччытын солбуйааччы Сергей Софронов.
Нам улууһугар СӨ спорка уонна физическэй култуураҕа министерствота күүс-көмө буолар. Ол курдук, биир дойдулаахпыт Константинов Николай Элляевич салалталаах бүгүҥҥү бөлөх Модут нэһилиэгэр үлэлиир. Нэһилиэктэр чөллөрүгэр түһүөхтэригэр диэри өрөспүүбүлүкэ спордун министерствотыттан үлэһиттэр тахсаннар субуотунньугу салгыахтаахтарын Сергей Анатольевич этэр.
Нам улууһун спорт управлениетыттан салайааччы Павел Иванов, Сергей Софронов, Партизантан спортинструктор Дьулустан Христофоров, спорт саала дириэктэрэ Зафар Асоев буоланнар бүгүн Граф Биэрэгэр субуотунньуктууллар.
Биир дойдулаахпыт, хапсаҕайга өрөспүүбүлүкэ күүстээх бөҕөһө Александр Румин Хатырыкка ууга барбыт спорт саала дириэктэригэр Айаал Алексеевка уонна спортинструкторга Валерий Винокуровка бэйэтин көмөтүн оҥорбут.
Харысхан Попов