Үлэ сылынан Салбаҥҥа нэһилиэкпит уордьаннаах бастыҥ үлэһиттэрин, совхознай тутууга маяк дьоннорун үтүө ааттарын үйэтитээри , үүнэр көлүөнэ ыччаттарбытыгар билиһиннэрээри, сыл устата ыытылла турар күрэхтэртэн биирдэстэрэ — Бочуот знага уордьаннаах кадровай булчут Николай Спиридонович Канаев аатынан сыал ытыытыгар күрэх буолан ааста.
Бу күрэх уол, эр киһи оруолун үрдэтэр сыаллаах ыытыллыбыта. Нэһилиэкпит 16 эр хоһууна кииристэ, саамай эдэр кыттааччы — 11 кылаас үөрэнээччитэ Эльдар Охлопков, аҕам саастаах булчуттарбыт Савва Корякин, Виктор Винокуров, Александр Жирков, Василий Кривошапкин күрэххэ кыттаннар, холобур буоллулар.
Тыҥааһыннаах киирсии түмүгүнэн кыайыылаах үрдүк аатын элбэх очколаах Александр Жирков ылла, 2 миэстэни Василий Кривошапкин, 3 миэстэни ыччаппыт Альберт Винокуров ситистилэр. Николай Спиридонович кыыһа, СӨ үөрэҕириитин туйгуна, норуот маастара Надежда Николаевна Канаева аҕатын аатынан сыал ытыы күрэҕэр сыаналаах бириистэри спонсордаан туруорда, бар дьонун үөрүүтүн үрдэттэ.
Бу күн түөлбэлэр икки ардыларыгар дарстка күрэх өрө көтөҕүллэн туран буолла. Түөлбэлэр бары көхтөөхтүк кыттан, 1 м. — «Сарыада», 2 м. — «Кыыс Күөлэ», 3 м. «Кырдал ыала» түөлбэлэр буоллулар. Күрэхтэри спортинструктор Андрей Еремеев, физкультура учууталлара Петр Лугинов, Иван Данилов тэрийэн ыыттылар.
Ити курдук, спортивнай күрэх киэһэтэ нэһилиэкпит дьонун сэргэхситтэ, сүргэтин өрө көтөхтө.
Татьяна Касьянова