Нам с. 11-дээх «Сулусчаан» оҕо уһуйааныгар кырачааннары остуол оонньууларыгар – саахымакка, дуобакка уонна «Сонорго» дьарыктыыллар.
—Ааспыт ыйга оҕо уһуйааннарын ортолоругар остуол оонньууларыгар улуустааҕы күрэхтэһии буолбута. Онно биһиги иитиллээччилэрбит биирдиилээн көрүҥнэргэ ситиһиилэммиттэрэ: саахымакка Марков Давид 1м., «Сонор» оонньууга Троева Оливия 1м., дуобакка Иванов Айсан 2м. ылбыттара. Уһуйааммытыгар оҕолору эбии үөрэх педагога Марианна Кириллина дьарыктыыр. Эбии үөрэх дьарыктара расписаниеҕа киирэн тураллар, нэдиэлэҕэ биирдиитэ «Сонор», саахымат, дуобат буолар,—диир сэбиэдиссэйи иитэр-үөрэтэр үлэҕэ солбуйааччы Октябрина Сыроватская.
Марианна Борисовна этэринэн, төрөппүттэр оҕолорун талбыт көрүҥнэригэр суруйтаран сырытыннараллар. Кини саахымакка барыта 31, дуобакка – 38, онтон «Сонорго» – 11 оҕону түөрт бөлөҕүнэн дьарыктыыр. Куруһуок 2016 сыллаахтан үлэлиир.
Остуол оонньуута оҕолор толкуйдуур дьоҕурдарын сайыннарар, кырачааннар дьарыктарын сөбүлүүллэр. Иитээччилэрэ Марианна Кириллина кинилэртэн сорохторо уһуйаан кэнниттэн оскуолаҕа үөрэнэ киирэн, салгыы дьарыктаналларын этэр. Ол курдук, дуобаты сөбүлээн билигин Василиса Гаврильева, Влада Мохначевская, Коля Кривошапкин, Саян Олесов, Даниил Сивцев, Андрей Гаврильев уо.д.а. «Олимпик» спортивнай оскуола дуобакка тренеригэр Надежда Георгиевна Протопоповаҕа эрчиллэллэр, күрэхтэргэ ситиһиилээхтик кытталлар.
Кини «Олимпик» тренердэрин кытта ыкса ситимнээхтик үлэлиир. Бу сыл күһүнүттэн аны саахыматы сөбүлээбит кырачааннар уһуйааны бүтэрэн, тренер Айсен Александрович Касьянов ыытар саахымат дьарыгар суруйтаран сылдьыахтарын ахтар.
«Сулусчаан» оҕо уһуйаанын иитиллээччилэрэ өй оонньууларыгар дьарыктанан үүнэллэр-сайдаллар, кыра саастарыттан күрэх тэтимин билэ улааталлар.
Касьян Олесов-Олук