Суол уонна сайдыы былыр былыргыттан күн бүгүҥҥээҥҥэ диэри быстыспат ситимнээхтэр. Суола суох – сайдыы суох. Ол эрээри, таҥара да, суол да сэрэҕи сөбүлүүр.
Дьон олоҕун, доруобуйатын харыстыырга, суоппардар суол быраабылатын тутуһалларыгар, үрдүк хаачыстыбалаах суолу оҥорорго былааннаах үлэ барар. Ол да буоллар, төһөнөн суолбут тупсар, оҥоһуллар да түргэн айантан, сыыһа-халты туттууттан, дьалаҕай быһыыттан араас быһылаан, саахал тахса турар.
ИДьМ Нам улууһунааҕы ГАИ отделениятын начальнига, полиция майора Дьулустан Лонгинов улуус сиригэр-уотугар, ааспыт сылы кытары тэҥнээн көрөн, суол саахалын туһунан иһитиннэрдэ.
2024 сыл тохсунньуттан алтынньы ыйга диэри туругунан – уопсайа 21 суол саахала тахсыбыт (2023 с. – 20), онтон араас таһымнаах киһи эчэйиилээх суол быһылаана – 7 (12 киһи эт-хаан эчэйитин ылбыт), ааспыт сылга – 10 (20 киһи эчэйбит). Бу сылга уонна былырыын 2 киһи ылбыт эчэйиилэриттэн суорума суолламмыт. Суол саахалыгар хомойуох иһин бу сылга – 4, 2023 с. – 9 оҕо эчэйбит.
ГАИ үлэһиттэрэ түүннэри-күнүстэри суолга быһылаан тахсыбатын туһугар туруулаһаллар. Араас хайысхалаах сэрэтэр акциялары, тэрээһиннэри, рейдэлэри тэрийэллэр. Ол курдук, олохтоох дьаһалтаттан саҕалаан уһуйааҥҥа тиийэ араас көрсүһүүлэри ыыталлар.
Убаастабыллаах суоппардар, суол быраабылатын тутуһан сылдьаргытын умнумаҥ, сатыы сылдьааччылар суолга сэрэхтээх буолуҥ, уоту тэйитэр элэмиэни иилинэ сылдьыҥ, суолу аналлаах сирдэринэн эрэ туорааҥ. Таҥара да, суол да сэрэҕи сөбүлүүр…
Семен Аргунов