«Нам улууһа» МТ дьаһалтата уонна улуус депутаттарын Сэбиэтэ байыаннай дьайыы кыттыылаахтарыгар уонна кинилэр дьиэ кэргэттэригэр, чугас дьонноругар көмө быһыытынан сир учаастактарын түҥэтэр туһунан быһаарыныы ылыммыттара. Алтынньы 17 күнүгэр улуус дьаһалтатын мунньахтыыр саалатыгар Никольскай нэһилиэгэр 20 сир учаастагын сертификатын улуус баһылыга Юрий Слепцов, улуус депутаттарын Сэбиэтин бэрэссэдээтэлэ Алексей Винокуров, Никольскай нэһилиэгин баһылыга Алексей Кривогорницын туттардылар. Бу туһунан «Нам улууһа» МТ пресс-сулууспата иһитиннэрэр.
Улуус баһылыга 2024 сылтан саҥа кыбаарталларга суол-иис оҥоһуллуутугар, гаас, уот ситимнэрэ тардыллыыларыгар үлэлэр оҥоһуллуохтаахтарын этэн туран, учаастак ылбыт ыаллар дьиэ тутуутун саҕалыылларыгар ыҥырда. “Нам улууһа” МТ баайын – дуолун салайар комитет салайааччыта Святослав Белолюбскай түҥэтиллибит сирдэр бары кадастровай нүөмэрдээхтэрин уонна уһаайба аайы бэлиэ мастар (колышкалар) анньыллыбыттарын эттэ уонна бу күннэргэ сир ылбыт дьоҥҥо уһаайбаларын ыйан – көрдөрөн биэриэхтэрэ.
Тэрээһиҥҥэ сылдьан сертификаттарын ылбатах сир хаһаайыттара, «Нам улууһа” МТ дьаһалтатын хонтуоратыттан үлэ бириэмэтигэр кэлэн ылыаххытын сөп. Аадырыс: Нам с. Октябрьскай, 1 уул, 1 этээс, 110 каб.
Хаартыскалар: «Нам улууһа» МТ пресс-сулууспата