Олунньу 22 күнүгэр, Аҕа дойдуну көмүскээччилэр күннэрин көрсө, III өрөспүүбүлүкэтээҕи «Илии сылааһа-2024» байыаннай дьайыы кыттыылаахтарыгар анаммыт таҥас тигиитигэр күрэх иккис түһүмэҕэ түмүктэннэ.
Күрэххэ уопсайа 13 улуустан хамаандалар кытыннылар. Нам улууһун Хатыҥ Арыы нэһилиэгиттэн «Сыдьаайа» иис сыаҕа түөрт күн устата таҥас тиктилэр. Ол курдук, олунньу 14-17 күннэригэр сэттэ киһилээх хамаанда: Дария Мальцева, Мария Кривошапкина, Галина Суханова, Валентина Сивцева, Варвара Слепцова, Прасковья Куличкина, Раиса Уваровская кытынна.
Түмүккэ 1 миэстэни – Хаҥалас улууһуттан Покровскай куорат ( 468.52 очко) , 2 миэстэни – Нам улууһуттан “Сыдьаайа” иистэнэр сыаҕа (463,3 очко), 3 миэстэни Мэҥэ-Хаҥалас улууһуттан Төҥүлү хамаандата (456,52 очко) ылла. Онтон ньэмиэт быһааччы Суханова Галина Ревовна бочуоттаах бастакы миэстэни ылары ситистэ.
Нам улууһун чиэһин үрдүктүк көмүскээбит Дария Мальцева салайааччылаах «Сыдьаайа» иис сыаҕар өссө төгүл улахан ситиһиилэринэн эҕэрдэлиибит. Сылаас илиилэринэн тигиллибит анал байыаннай таҥастар уолаттарбытыгар кыайыыны аҕаллын.
Надежда Сивцева