Ахсынньы 22 күнүгэр саха норуотун киэн туттар чулуу уола, биллиилээх государственнай, политическэй деятель, биһиги тумус туттар биир дойдулаахпыт Максим Кирович Аммосов төрөөбүт күнэ. Бүгүн улууспут киинигэр кини аатын сүгэр болуоссакка, Чаҕылхай Максим аатын дуораччы ааттаан, төрөөбүтэ 127 сылын бэлиэтээн, сүгүрүйүү миитинэ тэрилиннэ.
Өрөспүүбүлүкэбит Автономиятын туруулаһан төрүттээбит, саха норуотун сайдар суолун солообут сүдү киһибит үлэтин, олоҕун ахтан-санаан аастылар: Нам улууһун депутаттарын Сэбиэтин бэрэссэдээтэлэ Алексей Винокуров, Ленскэй нэһилиэк баһылыгын солбуйааччы Тимофей Охлопков. Кини үтүө аатын, норуотугар анаабыт чаҕылхай олоҕун, киллэрбит сүдү кылаатын үйэ-саас тухары умнубакка, өрө тута сылдьарбыт бэлиэтэннэ. Мустубуттар махтанан, сүгүрүйэн, кэриэстээн Максим Аммосов пааматынньыгар сибэкки дьөрбөтүн уурдулар.
Бүгүн улууспут олохтоохторун М.К. Аммосов аатынан култуура Дыбарыаһыгар 16:00 ч. кини аатын сүгэр ХИФУ «Сэргэлээх уоттара» КК айар коллективтарын «Сэргэлээх эдэр сааһа» эҕэрдэ кэнсиэрин сэргии, сэҥээрэ көрөргүтүгэр ыҥырабыт.
Касьян Олесов-Олук