Ю.А. Гагарин аатынан культура дыбарыаһыгар Саха Өрөспүүбүлүкэтигэр дьиэ кэргэн сылын түмүктүүр тэрээһин ахсынньы 13 күнүгэр ыытылынна. Манна «Сыл бастыҥ ыала — 2024» өрөспүүбүлүкэтээҕи кэтэхтэн көрүү куонкурус кыайыылаахтарын чиэстээтилэр.
Куонкурус 7 түһүмэҕинэн ыытыллыбыта. Ол курдук, кыайыылаахтарынан «Многодетная семья» түһүмэххэ 23 кыттааччыттан Нам улууһуттан Новгородовтар,
«Семья — хранитель традиций» түһүмэххэ 17 кыттааччыттан Амма улууһуттан Рязанскайдар,
«Сельская семья» түһүмэххэ 23 кыттааччыттан Мэҥэ Ханалас улууһуттан Сидоровтар, «Кочевая семья» түһүмэххэ 3 кыттааччыттан Муома улууһуттан Соловьевтар, «Приемная семья» түһүмэххэ 8 кыттааччыттан Дьокуускайтан Павловтар,
«Золотая семья» түһүмэххэ 12 кыттааччыттан Сунтаар улууһуттан Алексеевтар, «Молодая семья» түһүмэххэ 24 кыттааччыттан Ньурба улууһуттан Владимировтар буоллулар. Кыайыылаах дьиэ кэргэттэр айар быыстапкалара туран дьон-сэргэ кэрэхсэбилин ылла.
Үөрүүлээх тэрээһини Саха Өрөспүүбүлүкэтин бырабыыталыстыбатын бэрэссэдээтэлин солбуйааччыта Георгий Михайлович Степанов эҕэрдэ тылынан аста. Сыл устата туох үлэ ыытыллыбытын билиһиннэрдэ, «Сыл бастыҥ ыала -2024» куонкурус кыайыылаахтарыгар бэлэхтэри туттарда. Үөрүүлээх чаас кэнниттэн дьиэ кэргэттэр талааннарын көрдөрдүлэр. Валерий, Розалия Новгородовтар оҕолорунаан Уйгулааналыын, Сандааралыын уонна Сандаллыын саха фольклорун араас көрүҥүн холбоон нүөмэр толордулар.
Хамаҕатта нэһилиэгин дьаһалтатын, общественноһын ааттарыттан Новгородовтар дьиэ кэргэн бу сылга улахан ситиһиилэри бэлэхтээбиттэригэр, кинилэргэ күүс-көмө буолбут «Түһүлгэ» норуот айымньытын киинигэр, «Тупсууна» женсовет бэрэссэдээтэлигэр Саргылана Индееваҕа, «Фортуна» банкетнай зал салайааччытыгар Валентина Олесоваҕа, Саргылана Дмитриеваҕа махталбытын тириэрдэбит. Өссө да нэһилиэкпит, улууспут туһугар үлэлээн-хамсаан, түмсэн, бастыҥнар кэккэлэригэр сылдьыаҕыҥ, кэскиллээх олоҕу түстүөҕүҥ, бэйэ-бэйэни өйөһүөҕүҥ!
Л.Д. Ушницкая