Балаҕан ыйын 15 күнүттэн балаҕан ыйын 18 күнүгэр диэри байыаннай дьайыыга сылдьар уолаттарга анаан байыаннай таҥаһы тигиигэ «Илии сылааһа — 2023» өрөспүүбүлүкэтээҕи күрэх ыытылынна. Киэҥ далааһыннаах кэтэхтэн күрэххэ Нам улууһуттан Хатыҥ Арыы нэһилиэгиттэн Дария Мальцева салайааччылаах алта киһилээх «Сыдьаайа» хамаандата сайаапка ыытан кытынна.
Хамаанда түөрт күн устата быһыллан бэриллибит таҥастары тигэн иистэннилэр, уопсайа 11 араас көрүҥнээх сэттэ кэмпилиэги тиктилэр. Тикпит таҥастарын Дьокуускайга «Добровольческий швейный цех женщин-матерей РС(Я) «Илии сылааһа» («Тепло рук») дьүүллүүр сүбэҕэ киллэрэн туттардылар. Дьүүллүүр сүбэ тигии хаачыстыбатын, өтүүгүн, сиигин, иистэнэр миэстэ ирдэбилгэ эппиэттиирин көрдө.
Хатыҥ Арыы нэһилиэгин истиҥ ийэлэрэ, иһирэх эбээлэрэ бу сыл олунньу ыйтан саҕалаан, ситимнэрин быспакка анал байыаннай дьайыыга сылдьар уолаттарга кэтэр таҥас-сап тигэллэр. Быһыллыбыт быыкарайка таҥастарын Дьокуускай куораттан иистэнэр сыахтан ыланнар, Кыһыл Дэриэбинэ «Сайдыы» СК-гэр бэйэлэрэ кыра сыах арыйан күн бүгүҥҥэ диэри иистэнэ олороллор.
Дария Мальцева иһитиннэрбитинэн, өрөспүүбүлүкэтээҕи күрэххэ «Эр хоһуун» сэттэ комплегын тикпиттэр. Биир комплекка х\б көстүүм, ардахтан харыстыыр көстүүм, флисовай толстовка, футболка, тактическай ырбаахы, мөһөөччүк, куллуку, снуд, нательнай комплект тигиллибит.
Дария Мальцева салайааччылаах «Сыдьаайа» хамаандаҕа Мария Кривошапкина, Валентина Сивцева, Прасковья Куличкина, Варвара Слепцова, Раиса Уваровская дууһаларын ууран, илиилэрин сылааһын бэлэхтээн үлэлэрэ үтүө түмүктээх буолла. Ол курдук, комиссия председателэ «Илии сылааһа» өрөспүүбүлүкэтээҕи иистэнэр сыах төрүттээччитэ Саввина Ирина Егоровна иһитиннэрбитинэн, уопсайа республика араас муннуктарыттан 12 хамаанда кыттыбыт. Үс киһилээх дьүүллүүр сүбэ Ирина Егоровна, Татьяна Кривошапкина, Айталина Рожина быһаарыытынан түмүк маннык буолбут: 1 миэстэни Амма улууһа; 2 миэстэни Мэҥэ-Хаҥалас «Төҥүлү»; 2 миэстэ — «Сыдьаайа» Нам улууһа, Хатыҥ-Арыы нэһилиэгэ; 3 миэстэ — Таатта улууһа; 3 миэстэ — «Чараҥ» Чурапчы улууһа; 3 миэстэ — «Эркээни» Хаҥалас улууһа, Покровск ыллылар.
Комиссия чилиэттэрэ хас биирдии кыттыбыт хамаанда туох сыыһалааҕын, итэҕэстээҕин сиһилии быһааран биэрдилэр, маастар кылааска сылдьыбыт ийэлэр үлэлэрэ хаачыстыбалааҕын эттилэр. Түгэнинэн туһанан, Хатыҥ Арыы нэһилиэгин баһылыгар Иван Ноговицыҥҥа «Сыдьаайа» иистэнньэҥнэр хамаандаларын ааттарыттан махтал тылларын тиэртилэр.
Балаҕан ыйын 28 күнүгэр Дьокуускайга үөрүүлээх быһыыга–майгыга өрөспүүбүлүкэтээҕи күрэх кыттыылаахтарын чиэстээһин буолла. Кыайылаахтарга күрэх спонсора, Саха Республикатын тыа хаһаайыстыбатын министрын эбээһинэһин толорооччу Петр Иванович Попов махтал суруктарын туттартаата уонна иистэнэр массыына, өтүүк бэлэх уунна. Маны тэҥэ, Арассыыйа Дьоруойа Александр Колесов мангал бэлэхтээтэ. Саха Республикатын “Илии сылааһа” сыах салайааччыта Ирина Саввина сертификат, вымпел, нэһилиэк баһылыга Иван Ноговицын кыайыылаах ийэлэргэ грамота, сэмэй бэлэх туттартаатылар.
Нэһилиэкпит күн күбэй ийэлэрин өссө төгүл улахан ситиһиилэринэн эҕэрдэлээн туран, чэгиэн доруобуйаны, дьиэ кэргэҥҥэ этэҥҥэ буолууну баҕарабыт!
Надежда Сивцева