Бүгүн «Нам улууһа» МТ 2023 сыллааҕы үлэтин отчуоттуур улуус баһылыгын э.т. Анатолий Павлов салайааччылаах 1-кы бөлөх Таастаахха сырытта. Улуус депутаттарын сэбиэтин ааспыт сыллааҕы үлэтин Владимир Соловьев, 2023 с. байыаннай дьайыы кыттыылаахтарыгар туох, төһө көмө оҥорбуттарын, иккитэ командировкаҕа сырыыларын туһунан «Буойун» түмсүү председателэ Павел Оконешников сырдаттылар.
Ааспыт сыллааҕы боротокуолга киирбит туруорсуулар туолууларын Анатолий Иванович билиһиннэрдэ. Ол курдук, Нам—Таастаах икки ардынааҕы суол кытыытынааҕы талах кэрдиллибит, сайылыкка, наука киинигэр уот ситимэ тардыллыбыт.
Семен Оконешников Таастаахтааҕы «НКТЭ» АО учаастагын хочуоллара уонна хочуолунайдара эргэрбиттэрин этэн туран, баһаарынай емкость туруохтааҕар эппиэттээбэтин эттэ. Манна хоруйа, улахан кыамталаах оһоххо уларытан биэрэргэ газ давлениета кырата, эппиэттэспэтэ атахтыыр диэн буолла. Чаакыйа үрэх суолун уонна олому өрөмүөннүүргэ туруоруста. Суол кытыытынааҕы талахтары кэрдэргэ олохтоохтору кытары дуогабардаһаллара буоллар быдан ордук буолуо этэ диэн санаатын эттэ. Таастаахтан Кэҥкэмэҕэ, Искраттан Намҥа диэри суол өрөмүөннэниэ дуо, улууспутугар карьер тоҕо суоҕуй диэн ыйытта.
Толору хааччыллыылаах уопсай дьиэҕэ олорор, бу үөрэх дьылыгар үлэлии кэлбит эдэр учуутал этэринэн, убаҕас тобоҕу оботтороллоругар улуус кииниттэн ый ахсын 30 тыһ. төлөөн оботторор кыһалҕаны көрсөллөр эбит.
Дьиэ докумуонун оҥоттороору гыммыттара комплекснай кадастровай картаҕа билигин да атын сиргэ турар мэһэйдэрэ баар эбит. Итиэннэ эмп-томп кыһалҕатын баарын ыйдылар, эбии штат туруорустулар. Итиэннэ доруобуйа харыстабылын салаатыгар үгүс ыйытыгы биэрдилэр. Кириитикэлэр да иһилиннилэр.
Хаарбах туруктаах дьиэттэн дьону көһөрүү программатынан тутуллубут алта квартиралаах дьиэ тутуутун хаачыстыбата мөлтөҕүн олохтоохтор этиннилэр.
Оҕо саадка 2015 с. ыла оҕо оонньуур балаһааккатын, күрүө оҥоруутун туруорсубуттарын бу да сылга санаттылар. Тыа хаһаайыстыбатыгар да тус сыаллаах ыйытыы биэрэн, сөптөөх хоруйу ыллылар.
Таастаах нэһилиэгин олохтоохторо «Нам улууһа» МТ дьаһалтатын ааспыт 2023 сыллааҕы үлэтин 100% биһирээтилэр.
Семен Аргунов